Shqiptarët do paguajnë 2,3 miliardë lekë për “gabimet” e INUK

Prishja selektive nga INUK, qytetarët fitojnë gjyqet. Avokati i Popullit: Respektoni procedurat ligjore!

232 milionë lekë, vetëm për periudhën qershor-nëntor është fatura e “gabimeve” të Inspektoratit Ndërtimor Urbanistik Kombëtar (INUK) që duhet të paguajnë taksapaguesit shqiptar. Duke iu referuar transaksioneve në Open Spending Albania, nismë e Open Data, ka shumë raste kur qytetarët kanë fituar gjyqe dhe janë dëmshpërblyer për gabimet e Inspektoratit. Në 10 muajt e parë të vitit, me vendim gjykate, “gabimet” e INUK u kanë kushtuar taksapaguesve plot 232 milionë lekë (të reja). E gjithë kjo katrahurë është paralajmëruar edhe më herët nga Avokati i Popullit, i cili ka kërkuar respektimin e procedurave ligjore në lidhje me prishjen e ndërtimeve pa leje. “Rekomandohet marrja e masave administrative për respektimin e procedurave ligjore lidhur me prishjen e ndërtimeve të paligjshme, për të cilat ende nuk është vendosur nga ALUIZNI, përjashtimi apo jo nga procedura e legalizimit”, thuhej në kërkesën e Avokatit të Popullit drejtuar Kryeinspektores së INUK-ut, Dallëndyshe Bicit, si edhe kreut të ALUIZNI-t, Artan Lames. Avokati i Popullit ka ngritur në këtë mënyrë shqetësimet dhe ankesat e banorëve, të cilat me të drejtë kërkojnë një zgjidhje për problemin e tyre, pasi pothuajse të gjithë i kanë shtëpitë në proces legalizimi. “Nga shqyrtimi i ankesave dhe dokumentacionit përkatës na rezulton se pjesa më e madhe e tyre kanë filluar procesin e legalizimit dhe janë në faza të ndryshme të zhvillimit të tij. Ndërkohë, na rezulton se ALUIZNI, ende nuk ka dalë me një vendimmarrje përfundimtare për legalizimin ose jo të këtyre objekteve të ndërtuara nga subjektet”, citohej në shkresën e Avokatit të Popullit drejtuar institucioneve. Sipas shkresës së Avokatit të Popullit, kjo është një shkelje e hapur e shtetit të së drejtës. Edhe pas 8 vitesh nga vetëdeklarimi që kanë kryer, ankuesit ende nuk kanë një vendim administrativ që do të mund të shprehej për objektet e tyre informale, duke u mohuar të drejtën qoftë dhe të vendimit të dhënë nga ALUIZNI për moskualifikimin e procedurës së legalizimit. Avokati i Popullit ka kërkuar më herët pezullim të vendimit të INUK për prishjen e objekteve që janë në proces legalizimi.

Rezultate permbledhese

Eksporto te dhena

Transaksione