(Fjalë të urta)
Shkrimtari dhe studiuesi Agim Shehu nga përvoja e tij e pasur dhe e gjatë ka krijuar në mërgim ‘1000 fjalë të urta’ (Proverba) përmbledhur… Ato përfaqësojnë 5 hapësira jete të tij: Atdhetarizmi, demokracia, shoqërore, artin dhe erotikën. Po botojmë disa prej tyre…
Erotike:
-Nën hijoren (ombrellën) e një vajze pikat e shiut kanë zëra zogu.
-‘Po’-ja e vajzës shpesh është si drita e yjeve, është nisur, por do kohë të arrijë.
-Burrat hijerëndë me pushtet shpesh pushtohen nëpërmjet grave të tyre, ashtu si lisi pushtohet nëpërmjet hardhisë rrotull tij.
-Nusja qan kur kali a taksia e shpie te dhëndëri; nëse do ta kthenin pas do vinte ulërimën.
-E dashura që ka vendosur të të ikë i ngjan erës: nuk ke nga e kap për ta rikthyer.
-Në këshillat mbi ‘moralin’, më shumë e ngrënë zërin ato që presin rastin ta shkelin moralin.
-Në tërësi martesat e dyta janë si gjellët e ri ngrohura, lëshojnë ujë.
-Po u grinde me shtetin ke humbur të sotmen, po u grinde me gruan ke humbur të nesërmen.
-Lëvizjet e femrave në valle, sidomos kur kanë pirë dhe pak, u ngjajnë lëvizjeve të tyre në shtrat.
-Femrat që ndjejnë largimin e moshës shpesh u ngjajnë fiqve të pjekur shumë: pak t’u fryjë era, këputen e bien.
-Mosha e re çel lulet, mosha e mesme lidh kokrrat, pleqëria i vjel.
-Prostitutat shqiptare humbur nëpër botë janë nderi i humbur i shtetit.
Arti
-Vepra më e mirë e një shkrimtari është ajo të cilën ende s’e ka shkruar, e ndoshta do ta marrë me vete.
-Ndodh që poetët e dobët bëhen prozatorë të mirë, ashtu si vajzat e zakonshme bëhen bashkëshorte të mira.
-Në çdo vepër të mirë arti, mendimi dhe ndjenja kanë harmoni si deti me valët.
-Nëse mitologjia është trupi i qiririt, historia është flaka e tij.
-Kur artisti flet shumë për veprën e vet, do të thotë që vepra u flet pak të tjerëve, ose u ka folur keq.
-Talenti i shquar është si kali me revan të bukur: nuk shahet për pluhurin që lë pas.
-Poetët u ngjajnë zogjve: fluturimin e kanë përpara, këngën e lënë pas.
-Shkrimtarët që zhurmojnë rreth vetes harrojnë se dasma nuk matet me sazet përjashta por me ‘trapezin’ brenda.
-Pasi mbaron veprën, artisti ndjen një lodhje të ëmbël lehone.
-Zgjatjet në arte u ngjajnë thonjve: kur priten nuk të dhëmbin.
-Gjetjet e bukura të talentit të kujtojnë atë që, shumë barinj shkelin mbi mineral, por gjeologu i aftë i gjen.
-Të shkruash kujtimet e fëminisë është njëlloj si të shkruash në ajër me një meteor.