“Po të më ftojë shteti i Kosovës unë me kënaqësi do ta vizitoja vendin tuaj”, ka thënë Bakir Izetbegoviç, udhëheqësi boshnjak i presidencës trepalëshe të Bosnjës dhe Hercegovinës.
Ai ka deklaruar se ka dëshirë të madhe që ta thërrasin për vizitë në Prishtinë dhe këtë vizitë nuk do hezitonte ta realizonte nëse i vjen ftesa.
Përveç kësaj, ai ka shtuar se është e çuditshme se si Kosova dhe Serbia po flasin me njëra-tjetrën, ndërsa Kosova e Bosnja nuk po munden të arrin së paku në nivel të njëjtë të kontaktit, njofton Klan Kosova.
Izetbegovic ka pohuar gjithashtu se është për shkak të Republikës Serbe në Bosnje që shteti i tij s’po mundet ta pranojë pavarësinë e Kosovës.
Megjithatë, ka shtuar se do të shohë se cilat janë mundësitë që së paku në nivel të shkëmbimit ekonomik të ketë lehtësime.
Bakir Izetbegovic dhe liderët e tjerë të rajonit po marrin pjesë në Samitin e Brdo – Brioneit, që këtë herë po mbahet në Shkup të Maqedonisë.
