Prej 2011 janë kthyer në Kosovë mbi 120 pjesëtarë të ISIS-it

58
Numri i personave që besohet se kanë qenë në zonën e konfliktit në Siri që nga viti 2011 e deri më tani dhe të cilët janë kthyer në Kosovë është mbi 120. Këtë e ka deklaruar zëdhënësi i Policisë së Kosovës, Baki Kelani.
Paralajmërimet që i bëri presidenti i Maqedonisë, George Ivanov, se 70 pjesëtarë të ISIS-it, që ishin në Siri janë kthyer në këtë shtet, kanë reflektuar në shtimin e masave të sigurisë edhe në Kosovë.
Por, përveç kësaj, këto masa janë shtuar edhe pas datës së sulmeve të fundit terroriste në fillim të këtij muaji në Paris, ku vdiqën rreth 130 persona.
Burime brenda organeve të sigurisë kanë bërë me dije se institucionet përgjegjëse, duke përfshirë Policinë e Kosovës, Agjencinë e Kosovës për Inteligjencë dhe mekanizmat tjerë relevantë, janë duke përcjellë në detaje aktivitetet e kosovarëve, të cilët në kohë të ndryshme kanë qenë në Siri e Irak e që janë kthyer në Kosovë, shkruan “Zëri’.
Sipas zëdhënësit të Policisë së Kosovës, Baki Kelani, numri i personave që besohet se kanë qenë në zonën e konfliktit që nga viti 2011 e deri më tani dhe të cilët janë kthyer në Kosovë është mbi 120.