Dy vjet, nga absurdi zyrtar, shteti nuk reagon ndaj ankesës që kanë bërë punonjësit
Në datën 20 nëntor 2015, gazeta “Telegraf” denoncoi skandalin shtetëror, që lidhej me sigurinë e jetës së oficerëve të shërbimit informativ të ushtrisë dhe të shërbimeve të tjera në ushtri, të cilat përbëjnë rrezik për jetën e punonjësve! Sipas një vendimi qeverie, në Statusin e këtyre ushtarakëve përcaktohet edhe kategoritë që e përfitojnë këtë siguri jete me mbrojtje nga shteti! Çfarë ndodh? Shteti u siguron jetën, vetëm 2% të policëve ushtarakë që rrezikohen prej krimit, kur të gjithë janë të ekspozuar përballë krimit për shkak të detyrës! Më konkretisht, këtë absurd e ligjëron VKM Nr. 904, datë 11. 11. 2015 “Për përcaktimin e kategorive të përfituesve, të masave e të kritereve për sigurimin e jetës së punonjësit të policisë ushtarake në Republikën e Shqipërisë”.
Ja VKM-ja e plotë
Në mbështetje të nenit 100 të Kushtetutës dhe të nenit 40, të ligjit nr. 13/2015, “Për Policinë Ushtarake në Forcat e Armatosura të Republikës së Shqipërisë”, me propozimin e ministrit të Mbrojtjes, Këshilli i Ministrave
VENDOSI:
1. Ministria e Mbrojtjes të bëjë sigurimin e jetës në masën deri në 2% të personelit, sipas tabelës së organizimit dhe të pajisjeve të punonjësve të Policisë Ushtarake.
2. Kategoritë që përfitojnë sigurim jete janë:
a) punonjësit, të cilëve, për shkak të detyrës funksionale, u rrezikohet jeta, si më poshtë vijon:
– Oficerë të Policisë Gjyqësore
– Inspektorë dhe agjentë të Policisë Kriminale
– Inspektorë të qarkullimit rrugor
– Inspektorë të rendit ushtarak.
b) punonjësit e tjerë, të cilët vënë jetën në rrezik dhe që përcaktohen në urdhrin e Komandantit të Policisë Ushtarake për kryerjen e detyrave operacionale.
