Data 20 dhjetor 1966 është ditëvdekja e vlonjatit të madh ,Ali Asllani, poetit që i këndoi Vlorës me himnin e famshëm: “Vlora, Vlora”. Kryesekretar i Ismail Bej Vlorës në Qeverinë e Vlorës, Kryetar i bashkisë së Vlorës në çlirimin e parë të saj, më 1920 dhe pushtimin e dytë, më 1939. I harruar si të gjithë atdhetarët e kontribuesit e Vlorës! Minimalisht do duhej të kishte një bust para godinës së bashkisë së parë ku shërbeu si kryetar i saj.
Vlora, Vlora!
Jam vlonjat e jam vlonjat,
e kam shkabën mëm’ e atë,
shkaba trime dykrenore
fron’ e saj e ka në Vlorë!
Vlora, Vlora, Vlora, Vlora,
rroki armët, bëja forra!
Vlora trime shqipëtare
si rob jetën s’e do fare,
a do mbetet Shqipëri,
a do bëhet tym e hi!
Vlora, Vlora, Vlora, Vlora,
rroki armët, bëja forra!
Jam vlonjat e jam burrë,
s’duron burri zgjedhë kurrë,
jam vlonjat e si vlonjat
di bëj luftë me të shtat’!
Vlora, Vlora, Vlora, Vlora,
Bjeri, moj, t’u lumtë dora!
Jam vlonjat dhe trim me besë,
rreth flamurit di të vdesë,
a me hir a me pahirë
doemos do rroj i lirë!