KATEGORIA E PARË/ Kryesimi u mbyll në javën e 29-të, specialisti Xhavit Sefa kritikon skuadrat e tjera
Nga Agron Kaja
Cilësia e kampionatit në Kategorinë e Parë është e dobët në përgjithësi. Edhe pse AF Elbasani me Bylisin kanë dominuar kampionatin, ka rënë shumë futbolli i traditës
Edhe katër javë na ndajnë nga përfundimi i Kategorisë së Parë për sezonin 2023-2024, dhe në javën e 29-të të tij u përcaktuan matematikisht vetëm verdiktet e kreut të renditjes, por jo për titullin kampion dhe për nënkampionin. Sepse AF Elbasani e Bylisi fituan ndeshjet e kësaj jave dhe në renditje krijuan diferencën ndaj Flamurtarit të vendit të 3-të: 15 pikë larg AF Elbasani dhe 13 pikë larg Bylisi. Të dyja këto skuadra do të jenë pjesë e Abissnet Superiore për sezonin e ardhshëm, ndërkohë që specialist i futbollit Xhavit Sefa, ish-futbollist dhe trajner i Lushnjës në elitën e futbollit shqiptar, deklaroi dje për gazetën “Telegraf” se ky kampionat në Kategorinë e Parë ka cilësi të dobët. Edhe pse AF Elbasani me Bylisin e merituan ngjitjen në Superiore, ai shprehet se ka rënë shumë futbolli i traditës. “Java e 29-të, përveçse veçoi dy kryesueset, të cilat matematikisht u ngjitën në Superiore për sezonin e ardhshëm, në ndeshjet e tjera u pa se cilësia vlen shumë për të dëshiruar. U ngjitën Elbasani me Bylisin në Superiore, por unë mendoj se futbolli i traditës në këtë kategori thuajse ka humbur fare. Sepse aty janë edhe Flamurtari, Apolonia, Tomori, Lushnja, Burreli e Korabi me histori në elitën e futbollit tonë. Sot, shumica e tyre po mendojnë edhe mbijetesën në këtë kategori”, kështu e nisi bisedën specialist i futbollit Xhavit Sefa, i cili nuk harron të theksojë edhe numrin e golave të shanuar këtë javë. “Edhe pse u shënuan 21 gola në javën që mbyllëm të Kategorisë së Parë, kjo mesatarja 3.5 gola për ndeshje nuk mendoj se vlen për t’u veçuar. Sepse duke patur skuadra që kanë cilësi të dobët në lojën e tyre, sikundër humbja 0-4 e Lushnjes ndaj Luzit, kaq gola ndoshta nuk janë shumë. Gjithsesi, në javën që u mbyll nuk e kishim parë dhe nuk e prisnim që Tomorri edhe pse fitoi, tregoi lojë të dobët. Në këto javë të mbetura, nuk është çudi që të kemi më shumë gola të shënuar në një javë. Pra, më duhet të përsëris faktin se cilësia është e dobët në përgjithësi, edhe pse AF Elbasani me Bylisin kanë dominuar kampionatin, sepse ka rënë shumë futbolli i traditës” Po si e shikon javën e 30-të specialisti Pepa? “Duke ju referuar kalendarit të 30-të, janë disa sfida që do vendosin deri diku skuadrat e mbijetesës dhe këtu unë shikoj se do përfshihen edhe Besa, Kastrioti, Burreli e Lushnja”, ishte kjo biseda e gazetës “Telegraf” me specialistin e futbollit Xhavit Sefa.
EUROPIANI “GJERMANI 2024”/ EDHE 59 DITË
Legjionarët në fundjavë, Manaj dhe Uzuni protagonistë
KALENDARI/ GRUPI B
NDESHJET E SHQIPËRISË
Datë 15 qershor 2024
Shqipëri-Itali Ora 21:00
Stadiumi: Signal Iduna Park
Në Dortmund (81.365 vënde)
Datë 19 qershor 2024
Kroaci-Shqipëri Ora 15:00
Stadiumi: Volksparkstadion
Në Hamburg (57.274 vënde)
Datë 24 qershor 2024
Shqipëri-Spanjë Ora 21:00
Stadiumi: Mërkur Spiel-Arena
Në Dyseldorf (54.600 vënde)
Në pritje të finaleve të kampionatit Europian “Gjermania 2024”, deri në nisjen e tij, në gazetën “Telegraf” do të sjellë paraqitjet e lojtarëve të Kombëtares sonë, dhe gjithçka do të ndodhë në këtë periudhë edhe me kundërshtarët tanë të Grupit B në këto finale. Disa nga futbollistët e Kombëtares shqiptare ishin protagonistë me skuadrat e tyre ku luajnë në Evropë, dhe kur kanë mbetur edhe 60 ditë deri më 15 qershor, kjo nisje i takon sulmuesit kuqezi Rei Mana, i cili dhuroi asistin e parë këtë sezon me Sivaspor, skuadër që po pretendon Europën. “Sofa Score” e vlerësoi me notën 8, më shumë nga të gjithë legjionarët e tjerë kuqezi, por këtë javë paraqitje të mirë bënë edhe Ivan Balliu në La Liga dhe Arbnor Muçolli në Suedi. Ndërsa Myrto Uzuni shënoi golin e tij të 10-të në La Liga, duke treguar se është i gatshëm të jetë pjesë e zgjedhjeve që do të bëjë trajneri Silvinjo për Europianin.
Trajneri Hima u “divorcua”, Burreli pret bankinë të re
Pas humbjes 0-1ndaj Tomorrit në Berat, trajneri i Burrelit, Klevis Hima deklaroi në konferencën për shtyp se ka menduar divorcin. “I uroj suksese Tomorrit për fitoren, por do flas me presidentin sapo të kthehemi në Burrel. Nuk kam më çfarë t’i jap kësaj skuadre dhe këtu mbyllet gjithçka”. Burreli e ka vështirësuar qëndrimin në Kategorinë e Parë dhe kalendari i javës së 30-të e përball me një kundërshtar mbijetese, Kastriotin e Krujës. Të presim se kush do jetë me skuadrën në bankinë.
NDESHJET, JAVA 30
E shtunë, 20 pril 2024
Korabi-Luzi 2008 15:00
E dielë, 21 prill 2024
Vora-Tomori 15:00
Flamurtari-AF Elbasani 15:00
Apolonia-Bylis 15:00
Lushnja-Besa 15:00
Kastrioti-Burreli 15:00
RENDITJA
Skuadrat Nd Pikë
1.AF Elbasani 29 69
2.Bylis 29 67
3.Flamurtari 29 54
4.Vora 29 45
5.Apolonia 29 43
6.Korabi 29 40
7.Besa 29 31
8.Lushnja 29 31
9.Burreli 29 31
10.Kastrioti 29 30
11.Luzi 2008 29 27
12.Tomorri 29 17