KATEGORIA E PARË/ Zëvendëstrajneri i Apolonisë, Rudin Nako, tregohet këmbëngulës për ecurinë deri në fund
Agron KAJA
Pas largimit nga drejtimi i Sedat Pajazitit, Apolonia u drejtua për dy ndeshje nga Rudin Nako, sepse drejtuesit më pas kanë ulur në bankinë argjentinasin Matias Tatanxhelo. Në sfidën e javës së 30-të, fierakët fituan 3-0 ndaj Korabit dhe për teknikun Nako, kanë qënë dy ndeshje të mira me dy fitore të merituara. “Kemi luajtur dy ndeshje shumë afër në kohë, java 29 dhe java 30. Skuadra në këto dy ndeshje ka luajtur shumë mirë, dhe u reflektua dukshëm se mbizotëron një atmosferë positive. Në sfidën me Korabin ishte në stol edhe trajneri ynë i ri Matias Tatanxhelo, i cili deri tani ende nuk e ka dhënë një opinion teknik për gjëndjen e skuadrës. Por e rëndësishme është se këto dy fitore na afruan më shumë në synimin tonë që të renditemi mes gjashtë skuadrave të para, që është zona Play-off”, kështu e nisi dje bisedën tekniku fierak Nako, i cili nuk e pranon se skuadra është duke u luhatur mes dy alternativave në renditje: mesin e artë dhe zonën Play-off. “Nuk jam dakrord të pranoj se jemi duke u luhatur në tabelën e renditjes mes dy alternativave, në Zonën “Play-off” dhe në mesin e renditjes që e mban larg skuadrën nga çdo rrezik. Por deri në ndeshjen e fundit, ne do rivalizojmë mes të gjitha skuadrave që e synojnë renditjen në zonën e Play-off-it. Të gjitha mundësitë i kemi me këtë grup të kompletuar lojtarësh, të cilët kanë vlera për të kërkuar më shumë. Me trajnerin e ri, këto ditë më shumë jemi duke punuar për të rritur psikologjinë e lojtarëve”. Tekniku Nako e vlerëson Kategorinë e Parë për nivelin e mirë në 30 javët e luajtura, madje edhe se luhet futboll i fortë. “Në gjykimin tim profesional, Kategoria e Parë është me nivel të mirë dhe luhet futboll i fortë. Ka skuadra shumë të mira, të forta dhe me investime, sikundër ka edhe shumë pak skuadra të cilat nuk janë ngjitur në nivelin e kësaj kategorie. Tashmë kampionati po i drejtohet fundit, dhe Apoloninë e shikoj vetëm në zonën Play-off. Vora dhe Flamurtari në krye, si dhe Valbona me Erzenin në fundin e renditjes, këto janë katër skuadrat që i kanë arritur synimet kur jemi në javën e 30-të. Skuadrat e tjera natyrshëm që do ti shfrytëzojnë këto tre javë që të kapin më të mirën e mundshme. Kështu edhe Apolonia për zonën Play-off”, kështu e mbylli bisedën Rudin Nako, pjesë e stafit teknik të Apolonisë, e cila këtë fundjavë udhëton në Shijak kundër Erzenit të vëndit të fundit në renditje.
Duka e rikonfirmon: Për Shqipërinë dhe FSHF-në, realitet i përkushtimit
Pas përfundimit të raundit të dytë të kualifikuesve në Ligën A, shtatë vendet e para të çdo grupi siguruan pjesëmarrjen në finale, ku do të luftojnë së bashku me Shqipërinë si vend organizator për trofeun e Kampionatit Europian U-17. Të hënën, më 31 mars, në orën 19:00, në “Shtëpinë e Futbollit” u hodh shorti i këtij turneu, ku skuadrat u ndanë në dy grupe me nga katër ekipe, që më pas u përcaktua edhe kalendari i ndeshjeve. Ky Kampionat Europian U-17 “Shqipëri 2025”, do të ngrejë siparin më 19 maj, ndërsa finalja e madhe do të luhet më 1 qershor. Dje në mesditë, Presidenti i FSHF-së, Armand Duka, konfirmoi edhe një herë rëndësinë e këtij turneu në vëndin tonë si një festë të vlerave sportive dhe pasionin për futbollin. “E rikonfirmoj se për Shqipërinë dhe Federatën Shqiptare të Futbollit, organizimi i këtij turneu është një dëshmi e përkushtimit tonë për zhvillimin e futbollit dhe ngritjen e tij në nivele ndërkombëtare. Në vitet e fundit, kemi treguar aftësinë tonë organizative me evente të rëndësishme, duke përfshirë finalen historike të UEFA Europa Conferencë League në vitin 2022 në Tiranë, e cila konfirmoi edhe një herë se jemi në gjendje të realizojmë ngjarje me ndikim dhe emocion të veçantë. Ky sukses na motivon dhe na inkurajon të punojmë edhe më shumë për të siguruar që EURO U17 2025, që do të luhet në Shqipëri 19 maj deri më 1 qershor, të jetë një tjetër moment historik për futbollin shqiptar dhe atë europian”. Ndeshja e parë në këtë Europian, do të luhet në “Arena Kombëtare” mes Shqipërisë dhe Portugalisë. “Arena Kombëtare” do të presë këtë duel historik për kuqezinjtë, më 19 maj në orën 18:00.
Grupi A
Francë, Gjermani, Portugali, Shqipëri
Grupi B
Itali, Belgjikë, Angli, Çeki
Pollozhani për “Telegraf”: Të marrim dy fitore në Vlorë
Trajneri i ri i Flamurtarit, Artim Pollozhani, bankinën te vlonjatët e nisi me barazim, në ndeshjen e luajtur në Burrel. Ky rezultat nuk e kënaqi, dhe dje për “Telegraf” ai theksoi se duhen dy fitoret në ndeshjet e radhës. “E rikonfirmoj se në dy ndeshjet në fushën tonë janë sfida që vendosin për kampionatin. Dhe ne do hyjmë në fushë për t’i fituar të dyja ndeshjet”. Në javën e 31-të Flamurtari pret Besën në Vlorë, në javën e 32-të pret Erzenin, dhe e mbyll në transfertë me Vorën.
KATEGORIA E PARË
Ndeshjet-Java 31
E shtunë, 5 prill 2025
FK Vora-Burreli 15:00
Flamurtari-Besa 15:00
Korabi-Kastrioti 15:00
Kukësi-Lushnja 15:00
Valbona-Pogradeci 15:00
Erzeni-Apolonia 15:00
RENDITJA
Skuadrat Nd Pikë
1.Vora 30 73
2.Flamurtari 30 69
3.Besa 30 65
4.Burreli 30 52
5.Pogradeci 30 43
6.Apolonia 30 40
7.Lushnja 30 40
8.Kastrioti 30 34
9.Korabi 30 32
10.Kukësi 30 28
11.Valbona 30 16
12.Erzeni 30 11
