Manchester United u tregua racional në transfertën e Beogradit me Partizanin, ku fitoi 0-1 me gol të Anthony Martial me 11-metërsh, për të marrë i vetëm kryesimin e Grupit L. “Djajtë e Kuq” me këtë sukses, hedhin një hap të sigurt drejt kualifikimit, që mund ta marrin matematikisht që në ndeshjen e ardhshme në “Old Trafford” përballë të njëjtit kundërshtar. Po në këtë grup Alkmaari shkatërroi 5-0 Astanan.
Roma komplikon gjithçka në Grupin J, pasi barazoi 1-1 në “Olimpico” me Borussian e Monchengladbachut, edhe pse deri në minutën e 3-të shtesë kryesonte me gol të Zaniolos. Pikërisht kur kishin mbetur edhe pak sekonda para vërshëllimës së trefishtë të gjyqtarit, Stindl barazoi me 11-metërsh tepër të dyshimtë, që shkaktoi reagimin e ashpër të verdhekuqve. Në sfidën tjetër të këtij grupi Basaksehiri fitoi minimalisht me Woflsberger me gol të Kahvecit.
Porto rrezikon seriozisht të mos kualifikohet në Grupin G, ku në raundin e tretë të ndeshjeve barazoi në shtëpi 1-1 me Rangers. Diaz kaloi fillimisht në epërsi portugezët, por skocezët kthyen baraspeshën në rezultat me Morelos. Po në këtë grup, Young Boys mposhti 2-0 Feyenoordin me dy 11-metërsha të realizuar nga Assale dhe Nsame.
Espanyoli mori kryesimin e Grupit H pasi mposhti në transfertë 0-1 Ludogorets, ndërsa CSKA e Moskës u befasua në shtëpi nga Ferencvaros me të njëjtin rezultat 0-1.
Në Grupin I klasifikimi nuk ndryshon, pasi u arritën dy barazime, Gent-Wolsfsburg 2-2 dhe St Etienne – Oleksandriya 1-1.
Braga, me fitoren 1-2 në fushën e Besiktasit merr e vetme kryesimin e Grupit K (7 pikë), e ndjekur nga Wolves me 1 pikë më pak, me skuadrën angleze që fitoi 1-2 në fushën e Slovan Bratislavës.
