Midis Kampionatit Europian, “Copa America” dhe shumë turneve të tjerë që vijnë këtë verë, ndoshta një miqësore midis Uellsit dhe Shqipërisë, të shtunën në Cardiff, nuk është ndeshje e spikatur. Por, për qendërmbrojtësin 21-vjeçar, Marash Kumbulla, nuk mund të ishte më e rëndësishme.
Mbrojtësi shqiptar i Romës shpreson se trajneri i ri i klubit, Jose Mourinho, do ta shikojë, ndërsa ai përpiqet të tregojë se e meriton një vend në formacionin titullar të sezonit të ardhshëm. Nesër duhet të merret me kërcënimin e superyllit të Real Madridit, Gareth Bale.
Kumbulla është i ngazëllyer për mundësinë e përballjes me Bale të shtunën dhe beson se testi kundër lojtarëve të atij kalibri e përmirëson lojën e tij. Për “Goal”, 21-vjeçari pohon: “Unë jam shumë i ngazëllyer. Uellsi ka shumë lojtarë të talentuar, është një ndeshje që do ta ndihmojë Shqipërinë të rritet. Unë me të vërtetë po pres të përballem me Bale. Jam gjithmonë i lumtur kur luaj kundër kampionëve të mëdhenj, sepse kjo më ndihmon të fitoj më shumë përvojë”.
Ai e di se si është të luash kundër sulmuesve kryesorë, teksa emëron yllin e Juventusit, Paulo Dybala, dhe fituesin e kurorëzuar së fundmi me titull, Romelu Lukaku, si kundërshtarët e tij më të vështirë deri tani. Kumbulla, gjithashtu është përballur me Cristiano Ronaldon katër herë:
“Kur jeni në fushë nuk mendoni se luani kundër tyre, sepse duhet të jeni të përqendruar në lojë. Pastaj, kur e ktheni filmin, është një ndjenjë e çuditshme, por e mirë. Që kur isha i vogël, i shihja ato duke luajtur për ekipet më të mira. Kështu që, loja kundër tyre është e çuditshme, por më bën shumë të lumtur”.
Këto lloj rastesh nuk e trondisin mbrojtësin e ri. Ai nuk ndjeu asnjë presion kur bëri transferimin te Roma nga Hellas Verona, verën e kaluar. Kishte shumë interes nga klube të ndryshme në Europë, përfshirë Tottenham, pas një sezoni të jashtëzakonshëm për verdheblutë: Sidoqoftë, sapo Roma u bë një opsion, ishte një vendim i thjeshtë për t’u marrë nga shqiptari:
“Unë u kënaqa, sepse shumë ekipe të forta më donin, por kur dëgjova se Roma ishte e interesuar, vendimi u bë më i lehtë. Brenda pak orësh kisha vendosur të shkoja në Romë dhe isha i lumtur për këtë”.
Sidoqoftë, ky që kaloi u provua se ishte një sezon zhgënjyes për Kumbullën, veçanërisht duke pasur parasysh pozicionin e tij si një nga mbrojtësit e rinj qendrorë më të vlerësuar në kontinent. Ai nuk mori kohën e lojës që do të shpresonte, duke filluar vetëm 14 ndeshje në Serie A dhe 21 në të gjitha garat, në total, shkruan telesport.
Por ai nuk mban inat ndaj trajnerit të larguar, Paulo Fonseca: “Unë kam një marrëdhënie të mirë me Fonseca, padyshim që doja të luaja më shumë, por kur je në një ekip shumë të mirë, me lojtarë shumë të talentuar, ndonjëherë është e vështirë të gjesh hapësirë”.
Kumbulla ka mësuar nga ish-lojtari i Manchester United, Chris Smalling. Ndërsa e shikonte nga afër mbrojtësin qendror në stërvitje, ka fituar nga teknika e tij: “Unë përpiqem të flas anglisht me të, sepse Chris nuk flet shumë mirë italisht. Ai më ka treguar se është një lojtar shumë me përvojë, që ka luajtur për shumë ekipe të nivelit të lartë. Kam mësuar shumë prej tij, nga mënyra se si ai luan”.
Gjatë ditëve të tij të hershme në Romë, Kumbulla e kishte të vështirë të adaptohej në jetën e tij të re, për herë të parëe larg familjes. Me kalimin e kohës u mësua me jetën në kryeqytetin italian, ndërsa beson se Fonseca solli lojën e tij.
Me Romën, që përfundoi e shtata në Serie A, megjithatë, dhe pa asnjë trofe, mandati i portugezit Fonseca përfundoi papritur. Mourinho do të drejtojë ekipin për sezonin e ri, i cili është një perspektivë emocionuese për Kumbullën ambicioz:
“Ende nuk mund ta besoj. Është si një ëndërr që të stërvitesh nga Mourinho. Trajneri i ri do të jetë një arsye tjetër për t’u përmirësuar dhe rritur shumë më tepër. Unë ende nuk kam folur me të, por e di që do të flas kur të arrijë në Romë. Do të jetë një përvojë e pabesueshme”.
Mourinho ka fituar trofe në klube në të gjithë kontinentin, përfshirë Porto, Chelsea, Inter, Real Madrid dhe Manchester United. Kumbulla beson se historia e tij e suksesit do ta transformojë Romën:
“Gjëja më e rëndësishme që Mourinho do t’i sjellë Romës është mentaliteti fitues. Të gjithë e dinë se ai ka fituar diçka në çdo skuadër që ka menaxhuar. Unë do të mësoj shumë gjëra taktike dhe teknike prej tij, por gjëja më e rëndësishme është mentaliteti fitues”.
Kumbulla ka një ndeshje të mirë kundër Republikës Çeke, e pret me padurim, por Shqipëria nuk është kualifikuar në Europian, siç bëri më 2016. Ylli shqiptar, i lindur në Itali, megjithatë do të brohorasë për axurrët e Roberto Mancini në turneun e kësaj vere: “Unë do t’i shikoj të gjitha ekipet. Nuk jam i sigurt se kush do të fitojë, sepse ka shumë ekipe të forta, por shpresoj që Italia të triumfojë, sepse është si atdheu im i dytë”
