Kur ishte hera e fundit që hëngrët pica apo patatina? Ato futen në dietën tuaj më shpesh sesa mendoni. Një e treta e njerëzve porositin ushqim të gatshëm çdo javë dhe shumica hanë ëmbëlsira apo biskota çdo ditë.
“Ushqimet ultra të përpunuara (UPFs) janë bërë dominues në dietën tonë, duke përbërë më shumë se gjysmën e kalorive që konsumojmë,” shpjegon Kim Pearson, dietologe e specializuar në humbjen në peshë.
“Ato janë të shpejta, të përshtatshme dhe të dizajnuara për të nxitur mbikonsum. Mund të bëhen lehtësisht pjesë e rutinës sonë të përditshme. Por me kalimin e kohës, këto karbohidrate të rafinuara dhe sheqerna të shtuara mund të çojnë në shtim në peshë, rënie të energjisë dhe fryrje.”
Pranvera është koha ideale për të rishikuar çfarë po hamë dhe, pa pasur nevojë për një dietë tërësisht të re, vetëm shmangia e ushqimeve më problematike mund të ndihmojë në rënien në peshë përpara verës.
“Ndërsa natyrshëm fillojmë të orientohemi drejt vakteve më të lehta, është koha e duhur për të kufizuar UPF-të dhe për t’u fokusuar te ushqime të plota dhe të pasura me lëndë ushqyese që mbështesin menaxhimin efektiv të peshës dhe ofrojnë energji të qëndrueshme,” thotë Pearson. Ja cilat janë ushqimet që duhet të shmangni për të humbur peshë – dhe alternativat e shëndetshme që nuk do t’ju lënë me dëshirë për versionin e tyre origjinal.
1. Pica
Një nga ushqimet më të preferuara, por edhe më problematike. Disa pica të gatshme mund të përmbajnë deri në 3,700 kalori – më shumë se një kile dhjam.
Zëvendësim i shëndetshëm: Përdorni një tortilë me miell të plotë si bazë, shtoni salcë domatesh të bërë vetë, perime si kërpudha dhe angjinare, pak djathë dhe piqni në furrë. Vetëm 430 kalori!
2. Lazanja
E shijshme, por e ngarkuar me kalori, yndyrë të ngopur dhe kripë.
Zëvendësim i shëndetshëm: Zëvendësoni petat me feta kungulli dimëror, përdorni mish të grirë organik dhe salcë domatesh të freskët. Shumë më pak kalori dhe yndyrë.
3. Patate të skuqura
Të pasura me kalori dhe me pak vlera ushqyese, konsumohen lehtësisht në sasi të mëdha.
Zëvendësim i shëndetshëm: Prisni patatet ose patatet e ëmbla në feta, hidhni pak vaj ulliri dhe erëza, dhe piqni në furrë.
4. Kroasantë
Një kroasant përmban mesatarisht 250 kalori dhe shumë yndyrë.
Zëvendësim i shëndetshëm: Buka “life-changing” nga nutricionistja Sarah Britton – me fara, tërshërë, fruta të thata dhe pak shurup panje.
5. Pulë e skuqur
E përpunuar, e mbushur me yndyrë dhe aditivë.
Zëvendësim i shëndetshëm: Piqni ose gatuajeni në air-fryer në shtëpi me përzierje tërshëre dhe erëzash.
6. Akullore
E pasur me sheqer dhe aditivë, dëmton përpjekjet për humbje në peshë.
Zëvendësim i shëndetshëm: Bëni “nice cream” me banane të ngrira të përziera me vanilje natyrale apo kakao.
7. Ëmbëlsira dhe biskota
Kalori të fshehura që konsumohen çdo ditë dhe prishin ekuilibrin e dietës.
Zëvendësim i shëndetshëm: Muffin me tërshërë dhe banane apo hurma. Ose çokollatë e zezë me fruta të freskëta.
8. Makarona me djathë
Deri në 900 kalori për porcion, pa proteina dhe të pasura me karbohidrate të rafinuara.
Zëvendësim i shëndetshëm: Përdorni makarona me proteinë edamame, perime të skuqura dhe vaj ulliri.
9. Mish i përpunuar
Si sallami, proshuta dhe salsiçet – të larta në kripë dhe yndyrë.
Zëvendësim i shëndetshëm: Mish i freskët dhe organik ose përdorni bishtajore si burim proteine.
10. Pije të ëmbla nga kafetë
Një frappuccino mund të përmbajë më shumë kalori se një vakt!
Zëvendësim i shëndetshëm: Kafe me pak qumësht ose latte pa sheqer. Shtoni kanellë apo vanilje natyrale për shije.
11. Burgerë të gatshëm
Të pasur me yndyrë, karbohidrate të rafinuara dhe salca të përpunuara.
Zëvendësim i shëndetshëm: Përgatisni burgerët në shtëpi me mish organik ose bishtajore, shtoni perime të freskëta dhe zëvendësoni bukën me sallatë për një version më të lehtë.
