Deputeti demokrat Xhelal Mziu zhvilloi një takim të ngrohtë me bashkëatdhetarët shqiptarë, që jetojnë prej vitesh në Kardhicë (Karditsa), Greqi. Në këtë takim, Mziu, së bashku me kolegët e tij Eno Bozdo, Andrea Mano dhe Qani Xhafa, theksoi rëndësinë e votës së diasporës si një vlerë e shtuar për përfaqësimin dhe kontributin e tyre në jetën politike të vendit. “Vota e diasporës është thelbësore për një parlament të përfaqësuar me dinjitet dhe për të garantuar që kontributi i diasporës të marrë vlerësimin e duhur,” -tha Mziu gjatë fjalës së tij. Mziu falënderoi drejtuesen e Partisë Demokratike në Lamia, drejtuesin e Shoqatës Shqiptare në Kardhicë dhe të gjithë qytetarët e tjerë që kontribuan në organizimin e këtij takimi të frytshëm.“Bashkë me diasporën, ne do t’ia dalim. Ata (PS) humbin, ne fitojmë! Është radha e diasporës të bëhet pjesë e ndryshimit,” përfundoi deputeti demokrat.
