Kryebashkiaku i Tiranës, Erion Veliaj është shprehur se kryeqyteti është sot një qytet model sa i takon politikave të strehimit për njerëzit në nevojë. “Jam shumë krenar për politikat tona të strehimit, ku një prej nismave është kredia e butë. Bashkia e Tiranës, bashkë me Bankën Intesa, janë pjesë e një sistemi të strehimit social, prej së cilës kanë përfituar një banesë me normën e interesit të paguar nga bashkia mijëra familje. Në vend që familja e re të paguajë qira çdo muaj, praktikisht atë qira e kthen në një këst të bankës, duke blerë praktikisht shtëpinë e tij çdo muaj. Ky është një qytet ku jepet bonus qiraje, ka banesa sociale, jepet kredi e butë; pra, kemi një paketë e cila e ka çuar Tiranën në një qytet model për të ulur thuajse në 0 nivelin e të pastrehëve”, tha Veliaj. Ai nënvizoi se Bashkia e Tiranës ka një sistem shumë të avancuar të mbrojtjes sociale për identifikimin dhe ndihmën ndaj atyre që janë në kushte të vështira. Një nga nismat për të mbështetur studentët është hapja pa pagesë e një llogarie bankare. “Jam gjithashtu shumë krenar që Intesa San Paolo është një nga bankat e para që është bërë pjesë e dy nismave tona të rëndësishme. Së pari, për të ndihmuar studentët. Kemi një Kartë Studenti ku një nga shërbimet, që ofron është tarifa “0” për të gjithë studentët që vijnë në Tiranë, që hapin llogarinë e tyre të parë”, shtoi Veliaj. Kreu i Bashkisë theksoi se Piramida është konceptuar që të mos ishte vetëm një shkollë tradicionale, por të shërbente edhe si një experience, që krijohet nga një ekosistem ku ka shumë aktorë që marrin pjesë. Piramida shërben edhe si qendra më e madhe e teknologjisë së informacionit, ku mijëra të rinj nga 12 deri 18 vjeç mësojnë gjuhën e kodimit.
