Nënkryetari i Lëvizjes Socialiste për Integrim, Petrit Vasili ka reaguar në lidhje me zjarrin e rënë pasditen e së enjtes në një magazinë në Kashar.
Vasili shprehet se qeveria i lë vetëm qytetarët edhe në mes të flakëve.
“Të gjithë tashmë e kanë përfundimisht të qartë dhe pa asnjë ekuivok, që Shqipëria është pa qeverisje dhe në mëshirë të fatit. Përveç ekzistencës së një grupi mashtruesish dhe grabitqarësh, asgjë tjetër nuk ka në qeverisjen e vendit. Ngjarja shumë e rëndë tragjike e zjarrit të shpërthyer në magazinat e qendrës tregtare tek Casa Italia, të njohur me këtë emër ku për ditë të tëra zjarri vazhdon e ku një efektiv, Arjan Sala sakrifikoi e shpëtoi ai i vetëm jetën e 25 njerëzve. Ishte përballë faktit shumë të rëndë, që institucionet e shtetit, zjarrfikëset e Bashkisë së Tiranës ishin aty pa mjete minimale të domosdoshme dhe zjarri vazhdoi për ditë të tëra, pa mundur dot që ai të dominohet e ku jeta e qytetarëve dhe prona e tyre ishte tërësisht në mëshirë të fatit”, u shpreh Vasili.
Vasili tha se ndërkohë që zjarri vazhdonte, qeveria vazhdonte në shesh propagandën për mandatin e tretë.
“Qindra e mijëra miliona euro, plus jetës së qytetarëve, u sakrifikuan, ndërkohë që askush nuk ishte prezent aty. Nuk ishte qeveria, nuk ishte Bashkia, nuk ishte Edi Rama, nuk ishte Erion Veliaj. Ndërkohë që zjarri vazhdonte, rrezikonte qytetarët e pronat me miliona, këta vazhdonin live propagandën për turpin e tyre, për faqen e zezë që quhet mandat i tretë i tyre. Këta njëkohësisht i bënin propagandë faqes së zezë dhe mandatës së turpit të tyre, sepse njerëzit po humbnin jetën atje dhe ishin në krye të detyrës“.
Sipas Vasilit, qeveria nuk ka qenë asnjëherë për popullin.Qeverisja nuk është asnjëherë, mungon gjithmonë, nuk ekziston.“Ekziston vetëm propagandë, në 3D. Ashtu siç mungonte edhe kur tërmeti ra, edhe kur Forcat e Ndërhyrjes së Emergjencës Civile nuk kishin mjetet më të domosdoshme minimale, nuk kishin as qen për të detektuar të mbijetuarit nën rrënoja. Vajtën me dy duar e me nga një lopatë. Po të mos ishin forcat e ndihmës nga Kosova, por dhe nga vende të tjera, mjaft jetë njerëzish nuk do ishin shpëtuar por po të ishte për këtë qeverisje do të ishin humbur dhe ato. Ashtu sikurse dhe këta nuk janë, nuk ekzistojnë, pranë mijëra familjeve shqiptare, të cilat përballen me pandeminë, shpenzojnë miliona lekë nga xhepi, e janë me mijëra familjet që janë në borxhe se qeveria e tyre nuk ekzistonte, nuk i mbështeti“.
Zjarri në magazinë vazhon të jetë aktiv, ndërsa nuk ka asnjë gjurmë të Salës, i cili mbeti i bllokuar brenda.
