Tenderat/ Porsche Albania kap “xhekpotin” e Lali Erit, gjysëm mln USD për 3 muaj

541
Sigal

Nga Boldnews.al

“Porsche Albania”, një prej kompanive që operon në tregun shitjes së automjeteve në Shqipëri ka kryer një transaksion me shumë interes me Bashkinë e Tiranës në vitin 2018.

Kompania private duket se ka rezultuar ndër më të preferuarat e Bashkisë së Tiranës së drejtuar nga Erion Veliaj, për vitin e kaluar.

Gjatë harkut kohor 3-mujor, Maj-Korrik 2018, “Porsche Albania” ka arritur të arkëtojë plot gjysëm milioni dollarë, pasi i ka shitur disa automjteve Bashkisë së Tiranës.

“Boldnews.al” konsultoi të dhënat e publikuara në portalin e specializuar për prokurimet publike, “spendingdata.al”, në të cilët rezulton se Bashkia e Tiranës ka kryer 5 pagesa për llogari të “Porsche Albania”, me vlerë totale 55.6 milionë lekë të reja, një shifër që kalon vlerën e gjysëm milioni dollarë amerikanë.

Gjithë sipas të dhënave publike, Bashkia e drejtuar nga Veliaj ka kryer këto pagesa, të ndara si vijon: dy pagesa në Maj 2018, një në Qershor dhe dy të tjera në Korrik 2018.

Në bazë të informacionit të publikuar në “spendingdata”, kompania “Porsche Albania” nuk rezulton të ketë pasur marrëdhënieve financiare me Bashkinë e Tiranës për 3 vitet e para të drejtimit të Veliajt.

Por, kur kryebashkiaku aktual i Tiranës hyri në vitin e fundit të mandatit të tij, “Porsche Albania” arriti të fitojë një kontratë të madhe, e cila i rriti ndjeshëm xhiron për vitin e kaluar.

Kompania “Porsche Albania” rezulton të jetë fituese në shumë tendera, të zhvilluar nga institucionet qeveritare dhe publike shqiptare.

Portali “spendingadata.al” ka publikuar transaksionet e kryera nga buxheti i shtetit për periudhën 2012-2019, kohë e cila përkon, në pjesën më të madhe, me qeverisjen e Partisë Socialiste.

Gjatë kësaj periudhe kohore (2012-2019), “Porsche Albania” ka fituar tendera publikë, në vlerë totale që përllogaritet në rreth 1 milion e gjysëm dollarë.

Në periudhën 2012-2013, sipas të dhënave të “spendingdata”, kompania e shitjes së automjeteve “Porsche Albania” ka fituar tendera me vlerë 17 milionë lekë të reja.

Një vit më pas, në 2014, arkëtimet e saj nga tenderat publikë ishin disi më të vogla. Ajo është shpallur fitues në procedurat e prokurimit publik me vlerë totale 4.3 milionë lekë të reja.

Në harkun kohor 2015-2019, “Porsche Albania” ka realizuar fitimin më të madh nga tenderat publikë. Gjatë kësaj periudhe, kompania e shitjes së automjeteve ka arkëtuar rreth 140 milionë lekë të reja, një pjesë kryesore e të cilës përbëhet nga pagesat që ka marrë nga Bashkia e Tiranës.