Nuk hyj tek deputetet e vjetër të këtij Parlamenti, por, gjithsesi, mu bë një periudhë kohe prej 12 vjetësh tashmë këtu dhe, kurrë, nuk e kam ndjerë veten më keq sesa sot, në këtë seancë. Është një seancë e pështirë, e turpshme! Është një seancë në të cilën, në qoftë se do të kemi grimcën me të vogël të përgjegjësisë, duhet të ndërpresim kalendarin e ditës dhe të merremi thelbësisht me këtë çështje. Ajo që ka ndodhur në Korçë, gjej rastin të falënderoj median që e transmetoi, është vërtet shumë e rëndë. Por, nuk është vetëm kaq! Problemi është shumë më i madh sesa 2000 lekë që iu dhanë studentëve në Korçë. Problemi është kthyer në sistem, dhe në qoftë se ne duam të merremi seriozisht me të, duhet të kuptojmë dhe pranojmë atë çka realisht po ndodh. Reagimi ynë, pas asaj që u pa në Korçë, është i pritshëm, është normal. Ne jemi opozitë dhe nuk mund të pranojmë që të shikojmë enturazhin e pushtetit me para në dorë duke blerë vota. Në qoftë se nuk bëjmë këtë reagim, ne nuk e meritojmë fare të jemi këtu. Detyra jonë është pikërisht kjo. Por a mbaron detyra jonë këtu?!
Dhe a mbaron detyra juaj tek mbrojtja?! E prisja edhe reagimin e Partisë Socialiste që do të gjente një artificialitet për të dalë nga kjo situatë, duke thënë që po paguanin autobusin.
Por, nga ana tjetër dua t’i drejtohem shumë deputetëve, të djathtë dhe të majtë, gjithkujt që ka një grimcë përgjegjshmërie, ka plot njerëz, për të cilët kam konsiderata pozitive njerëzore, pavarësisht se nuk i besoj apo pranoj arsyetimin apo vokacionin e tyre politik, a do të merremi ne me ketë problem? Apo do të bëjmë sikur nuk shikojmë? Kjo që po ndodh është e tmerrshme! Nëse kthehemi mbrapa, në vitet 1991-1992, kur janë bërë zgjedhjet e para pluraliste në këtë vend, nuk është paguar askush, nuk është harxhuar asnjë qindarkë e vetme, as nga kandidatët as nga komisionerët! Askush nuk ka paguar askënd. Pse? Sepse njerëzit kishin një zemër, kishin një moral dhe kishin një shpirt. Vinin dhe e bënin gjithçka me dëshirë, si tanët, si tuajt. Çfarë ndodhi më vonë? Më vonë filluam të paguajmë komisionerët, më pas filluam të paguajmë makinat për t’i sjellë njerëzit të votojnë, më pas filluam të paguajmë grupet e margjinalizuara për t’u marrë votat. Akoma më pas, e çuam përtej. Pse të lodhemi dhe të paguajmë makina, zgjedhës që të vijnë dhe të votojnë, komisionere?! Me mirë i biem drejt, paguajmë zgjedhës në një proces që nuk është më zgjedhor, por një treg kërkesë-ofertë për blerje votash me shumicë dhe pakicë. Paguajmë zgjedhësit direkt dhe kjo është “demokracia direkte”! Por kjo nuk është demokracia direkte e vullnetit të njerëzve, por është “demokracia direkte” e xhepave. Por kjo, nuk është demokracia për të cilën kanë nevojë shqiptarët. E çuam më pas më tutje, ndonëse ne të gjithë bëjmë sikur e harrojmë këtë gjë, e çuam edhe te tregtimi i deputeteve. E nisi Nano në parlamentin e 2001, e vazhduam ne, kur do zgjidhnim presidentin në 2007. Dhe bëjmë prapë sikur nuk e shikojmë dhe nuk e dimë këtë gjë. E nisi Nano, e perfeksionoi LSI-ja por, për hir të së vërtetës, jo vetëm LSI. Edhe parti të tjera, të vogla, në koalicion me ju apo në koalicion me ne. Edhe ne të PD-se bëmë sikur s’e pamë. Dhe vijmë sot, në Korçë. Por, përpara Korçës kemi qenë në 23 qershor. Nuk ka pasur gjë më të turpshme, gjë më të fëlliqur sesa fushata e 23 qershorit. Shkonim nëpër zonat elektorale dhe u thoshim zgjedhësve: “kemi bërë këto punë, kemi këtë projekt”. Dhe përgjigja që na vinte ishte: “ky ka dhënë 20, ky ka premtuar 30, ky tjetri 50. Sa jep ti?” Ne u detyrohemi një ndjesë dhe një përgjigje qytetareve shqiptare. Dhe, në qoftë se duam seriozisht te merremi me këtë problem, duhet të fillojmë të merremi që sot. Nuk mund te fusim thjesht kokën në rërë si struci dhe thjesht të themi që fajin e ka PS-ja. Sigurisht që ju e keni fajin për atë që keni bërë në Korçë! Pa asnjë dyshim! Jeni përgjegjës moralisht, politikisht dhe ligjërisht, përpara njerëzve dhe ligjit. Por, faj kemi sigurisht edhe ne qe kemi bërë sikur s’e kemi parë këtë fenomen kur e bënin partitë në koalicion me ne. Ne tetë vjet, ne e futëm Shqipërinë në NATO, hoqëm vizat, ndërtuam 1300 shkolla, 10 mijë kilometra rrugë dhe 799 ujësjellës. Po pse humbëm?! Në mënyrë figurative humbëm për shkak të emisionit “Fiks Fare”. Sepse ne nuk e pamë, apo bëmë sikur nuk e pamë dy vjet e kusur me parë. Ndërsa ju e patë atë emision, madje edhe e “hëngrët” ne 1 prill. Kemi vërtet vullnet dhe dëshire për t’u marrë me këtë çështje? Shpresoj që po! Por, nëse duam vërtet të merremi me këtë çështje dhe t’u japim një përgjigje shqiptareve, duhet të ndajmë mendjen që në këtë parlament disa do të vazhdojnë të jenë deputetë, ndërsa të tjerë duhet të lenë karriget. Nuk mundet që në këtë sallë të parlamentit të bashkëjetojnë të patrazuar, deputetët dhe blerësit. Kjo sallë ka vend për një kategori; ose për deputetët, ose për blerësit. Të dyja palët këtu, bashkë, nuk mund të rrinë dot.
Duhet te merremi dhe duhet te fillojmë qe sot!
“Vallja e nuses” në Parlament, PD-ja mbush tapetin e kuq me kartëmonedha
Seanca e djeshme në Kuvend u shoqërua me debate të ashpra mes maxhorancës dhe opozitës sa i përket akuzave për vjedhje votash në zgjedhjet vendore të Korçës. Diskutimi ka marrë një tjetër rrjedhë dhe gjatë fjalës së tyre deputetët e opozitës kanë akuzuar Partinë Socialiste se ka blerë vota. Kreu i grupit parlamentar Edi Paloka është shprehur se, tashmë është e faktuar që PS ka blerë votat, madje kjo gjë është denoncuar edhe në 23 Qershor. Në shenjë proteste ata kanë hedhur në sallë disa kartëmonedha simbolike me portretin e kryeministrit Edi Rama. Në këtë seancë nuk ka munguar dhe një lum akuzash të lëshuara nga ish-kryeparlamentarja Jozefina Topalli, e cila është shprehur se ky është një alarm për demokracinë dhe dëshmi se kemi një kryeministër dymijë lekësh.
