Gjykata Kushtetuese ka theksuar se Kuvendi nuk ka respektuar vendimmarrjen e mëparshme të Gjykatës Kushtetuese, në kundërshtim me detyrimin kushtetues, që buron nga neni 132 i Kushtetutës, dhe se ky refuzim i Kuvendit për zbatimin e vendimit të Gjykatës ka çuar në krijimin e një krize kushtetuese që jo vetëm cënon themelet e shtetit demokratik.
Kuvendi pritet që të nisë punë javën e ardhshme. Ndërkohë, mësohet se përpara nisjes së sesionit të ri, Këshilli i Legjislacionit do të mblidhet në seancë të jashtzakonshme, ku do të shqyrtohet dërgimi i mandatit të deputetes Olta Xhaçka në Gjykatën Kushtetuese.
Kërkesës së opozitës për seancë të jashtëzakonshme, kryeparlamentarja Elisa Spiropali iu përgjigj me mbledhjen e Këshillit në datën 27 gusht(sot). Aty do të vendosë dhe se si do vijojnë procedurat, ndërsa seanca e parë e Kuvendit parashikohet më 2 shtator.
Puna duket se do të nisë edhe për qeverinë. Kryeministri Edi Rama ka njoftuar mbledhje për kabinetin, ku ministra, kryebashkiakë dhe drejtorë të institucioneve do të bëjnë analizën vjetore ashtu siç tashmë është kthyer në një traditë të përvitshme.
Për këtë mbledhje janë njoftuar data 28 dhe 29 gusht ku në fokus do të jetë puna e ministrive, turizmi dhe çështje të tjera, të cilat do të diskutohen nga kabineti Rama. Deri më tani janë dhënë dy mundësi për takimin një në Himarë por edhe në Tiranë.
Nga ana tjetër, edhe opozita ka paralajmëruar tone të larta me rikthimin e seancave, qoftë me komisione hetimore, dosje në prokurori, por edhe me kërkesa për heqjen e mandateve të deputetëve, që sipas tyre janë në konflikt të interesit.
Risjellim në vëmendje se PD, më 7 gusht 2024, është shprehur se bazuar në një kërkesë të deputetëve të opozitës, Gjykata Kushtetuese ka theksuar se Kuvendi nuk ka respektuar vendimmarrjen e mëparshme të Gjykatës Kushtetuese, në kundërshtim me detyrimin kushtetues që buron nga neni 132 i Kushtetutës, dhe se ky refuzim i Kuvendit për zbatimin e vendimit të Gjykatës ka çuar në krijimin e një krize kushtetuese që jo vetëm cenon themelet e shtetit demokratik.
Ky vendim i Gjykatës Kushtetuese duket se ka nxitur 28 deputetë të opozitës që të kërkojnë mbledhjen e Kuvendit në sesion të jashtëzakonshëm, për heqjen e mandatit të Xhaçkës. Ata akuzojnë mazhorancën se në tentativë për të mbrojtur Xhaçkën kanë vënë në dyshim rolin dhe funksionin e Gjykatës Kushtetuese.
“Për shkak të krizës kushtetuese të krijuar nga ana e Kuvendit, cenimit të themeleve të shtetit demokratik që ka vënë në diskutim edhe vetë rolin dhe funksionin e Gjykatës Kushtetuese, por edhe zvarritjes së tejzgjatur prej më shumë se 2 viteve të kësaj çështjeje, që ka shkaktuar vonesa që e çojnë shqyrtimin në limitet kohore të mundësisë për vlerësim nga Gjykata Kushtetuese, në deklaratën publike të datës 10 Korrik 2024 të Kryetares së Gjykatës Kushtetuese, por edhe në paragrafin 65 të vendimit nr. 55/2024 të Gjykatës Kushtetuese, kërkohet shqyrtimi i menjëhershëm dhe me përparësi i kësaj çështje nga Kuvend”, thuhet në kërkesën zyrtare të nënshkruar nga kreu i grupit parlamentar të PD Gazment Bardhi dhe 28 deputetë të opozitës.
Më tej, në kërkesë theksohet se mbledhja e Kuvendit në sesion të jashtëzakonshëm, kur kërkohet nga një prej subjekteve kushtetuese është e detyrueshme për Kryetaren e Kuvendit, që ka vetëm një përgjegjësi që datën e sesionit ta caktojë brenda periudhës “3 ditë nga paraqitja e kërkesës”.
Deputetët e opozitës theksojnë se është e papranueshme mbrojtja politike dhe pengimi ndaj drejtësisë që mazhoranca po bën për rastin e ish-ministres dhe deputetes Olta Xhaçka, duke injoruar Kushtetutën dhe duke penguar zbatimin e dy vendimeve të Gjykatës Kushtetuese.
“Ne dënojmë me forcë standartin “një drejtësi për Edi Ramën dhe një drejtësi tjetër për gjithë të tjerët. Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor”,- thuhet në letrën e deputetëve të opozitës drejtuar Kryetares së Kuvendit Elisa Spiropali.
Ishte PD që bëri një kërkesë për t’i hequr mandatin e deputetes socialiste Olta Xhaçka, me pretendimin se bashkëshorti i saj ka përfituar pasuri publike me shpalljen si investitor strategjik nga Komiteti i drejtuar prej kryeministrit Rama. “Pamfleti” ka publikuar dhjetëra herë fakte se si Artan Gaçi është favorizuar si investitor strategjik.
Artan Gaçi ka përfituar 8 mijë metër katror tokë në Himarë. Konkretisht, për 8000 m2 tokë e plazh, që kanë marrë për resortin “Dreamades Luxury Suites” Gjilekë-Himarë, Artan Gaçi e Olta Xhaçka, kanë paguar 70 mijë lekë tarifë për shërbimet administrative dhe 15 mijë lekë, tarifë për menaxhimin e procedurave të investimeve strategjike.
