Në kuadër të Konferencës Ndërkombëtare mbi transparencën parlamentare që po zhvillohet këtë javë në Tbilisi, Kryetari i Kuvendit të Shqipërisë, Ilir Meta u prit në një takim të veçantë nga Kryeministri i Gjeorgjisë, Irakli Garibashvili. Kryetari i Kuvendit, Ilir Meta shprehu kënaqësinë e kësaj vizite të parë në Tbilisi dhe rikonfirmoi mbështetjen e plotë të Shqipërisë për integritetin territorial dhe për aspiratat integruese euro-atlantike të Gjeorgjisë, të cilat i cilësoi si të drejta dhe të qarta. Duke vënë në dukje potencialin e madh të marrëdhënieve dypalëshe, Meta theksoi se dy qeveritë duhet të punojnë së bashku për të plotësuar kuadrin ligjor në drejtim të marrëveshjeve për shmangien e taksimit të dyfishtë, atë të transportit detar dhe për krijimin e Komisionit të Përbashkët Ekonomik, përpjekje të cilat do të mbështeten nga të dy parlamentet. Kryeministri i Gjeorgjisë, Irakli Garibashvili e falënderoi Metën për mbështetjen e Shqipërisë dhe e cilësoi këtë vizitë të parë të një Kryeparlamentari shqiptar në Gjeorgji si një mundësi të artë për hapjen e udhës së një bashkëpunimi më të ngushtë në të ardhmen, veçanërisht në drejtim të shkëmbimeve tregtare dhe njerëzore. Meta dhe Garibashvili ndanë bindjen e përbashkët se të dy popujt bashkohen nga historia e turbullt e rajoneve reciproke dhe se gjeorgjianët ushqejnë ndjenja të forta simpatie për popullin shqiptar. Kjo është një bazë shumë e mirë për marrëdhëniet tona në të ardhmen u shpreh Kryeministri i Gjeorgjisë. Në përfundim, Kryetari i Kuvendit Meta vlerësoi përqasjen konstruktive dhe pjekurinë e autoriteteve gjeorgjiane në drejtim të forcimit të dimensionit ndërkombëtar të vendit duke theksuar se rajoni i Kaukazit ka nevojë për më tepër stabilitet, më tepër paqe dhe më tepër zhvillim ekonomik e social.
