Meta-Ponta: Bashkëpunimi Shqipëri-Rumani i shërben perspektivës europiane të Ballkanit

463
Sigal

Kryetari i Kuvendit, Ilir Meta, priti dje pasdite Kryeministrin e Rumanisë, Victor Ponta, me të cilin vlerësuan marrëdhëniet e shkëlqyera politike dhe tradicionale mes dy vendeve dhe diskutuan mbi thellimin e bashkëpunimit. Meta pasi vlerësoi marrëdhëniet solide mes Shqipërisë dhe Rumanisë, shprehu vullnetin për intensifikimin e tyre në të gjitha nivelet. Në këtë kuadër, z. Meta shprehu bindjen se, vizita e Kryeministrit Ponta në Tiranë do t’i shërbejë thellimit konkret të bashkëpunimit dypalësh, veçanërisht në drejtim të shkëmbimeve tregtare. Kryeministri i Rumanisë, Victor Ponta, shprehu kënaqësinë për këtë vizitë zyrtare në Tiranë dhe theksoi se Shqipëria mund të mbështetet në përkrahjen e Rumanisë në të gjitha çështjet e rëndësishme. Z. Ponta shprehu përkushtimin e Rumanisë ndaj avancimit të integrimit evropian të Shqipërisë, duke vënë në dukje se integrimi i plotë në BE është një qëllim i shkëlqyer strategjik për Shqipërinë dhe rajonin. Kreu i Kuvendit dhe Kryeministri i Rumanisë ndanë bindjen se forcimi i marrëdhënieve ndërparlamentare i shërben jo vetëm forcimit të marrëdhënieve dypalëshe, por edhe axhendës evropiane të Shqipërisë. Z. Meta në këtë kuadër konfirmoi krijimin e Grupit Parlamentar të Miqësisë Shqipëri-Rumani, i cili do të drejtohet nga Deputeti me origjinë arumune, Pirro Kapurani. Meta dhe Ponta diskutuan gjithashtu mbi zhvillimet në rajon, duke vlerësuar se bashkëpunimi mes Shqipërisë dhe Rumanisë i shërben forcimit të stabilitetit dhe perspektivës evropiane të Ballkanit, dhe duke theksuar njëkohësisht se të dy vendet mbeten të përkushtuara për perspektivën euro-atlantike të të gjithë vendeve të rajonit. Në këtë kuadër, Kryeministri Ponta dhe Kryetari Meta ndanë bindjen se rajoni i Ballkanit do të stabilizohet plotësisht, atëherë kur të gjitha vendet e rajonit, përfshirë Serbinë dhe Kosovën, të jenë anëtarësuar në Bashkimin Europian.