Ilir Meta ka prezantuar programin ekonomik të Partisë së Lirisë, duke e cilësuar atë si një plan të mirëfilltë për daljen e vendit nga kriza dhe për ndaljen e shpopullimit. Programi “Made in Albania” synon të ulë taksat, të mbështesë biznesin vendas dhe të transformojë ekonominë shqiptare në një model prodhues dhe eksportues, duke e çliruar atë nga ajo që ai e quan “narkoekonomi” dhe “piramidë korrupsioni”.
Në qendër të programit janë ulja e taksave për bizneset dhe profesionet e lira, heqja e disa tarifave të rëndësishme dhe krijimi i lehtësive për investitorët e rinj. Meta premton se energjia për bizneset do të ulet ndjeshëm, ndërsa qytetarët do të përballen me një kosto jetese më të ulët.
Duke e konsideruar këtë program si “dëshmi të përgjegjshmërisë politike dhe vizionit profesional”, Meta ka kritikuar ashpër qeverinë aktuale, duke e akuzuar për dështime dhe mashtrime ekonomike. Ai u ka bërë thirrje qytetarëve të mbështesin këtë plan më 11 maj, duke e konsideruar atë si “një fitore madhështore për një Shqipëri madhështore”.
Ilir Meta:
Programi ekonomik “Made in Albania” i Shqipërisë Madhështore është shembull i përgjegjshmërisë më të lartë politike dhe i vizionit të thellë profesional, me qëllimin më madhor për të shpëtuar vendin nga gremina ekonomike dhe nga drama e shpopullimit.
Ky program shumë realist është dëshmi e vërtetësisë dhe seriozitetit për të mbajtur dhe çuar deri në fund premtimet e bëra ndaj qytetarëve përkundrejt dhjetëra mashtrimeve të pacipa të Edi Ramës, i cili nuk ka mbajtur asnjë premtim por vetëm ka zhytur vendin në mjerim dhe ka zhgënjyer thellësisht qytetarët.
Ky program ekonomik për Shqipërinë Madhështore ul ndjeshëm koston e jetesës për qytetarët dhe çliron ekonominë familjare dhe kombëtare nga kriza dhe stanjacioni regresiv ekonomiko-shoqëror.
Një alternativë e shkëlqyer, plotësisht e financueshme, që maksimizon resurset e mëdha ekonomiko-natyrore të vendit për t’i dhënë frymëmarrje të gjerë zhvillimit të qëndrueshëm dhe progresiv ekonomik, si dhe garanton të ardhmen e të rinjve tanë këtu në Shqipëri duke ndalur shpopullimin dhe për të shnderruar Shqipërinë në një fuqi prodhuese dhe eksportuese në rajon.
Ky program ka në qendër të tij qytetarin dhe rritjen e mirëqenies së tij, si dhe biznesin dhe nxitjen e prodhimit vendas duke i dhënë fund narkoekonomisë së mbështetur mbi ndërtimin e kullave, pastrimin e parave të pista, të drogës dhe korrupsionit, që ja kanë bërë absolutisht të pamundur shqiptarëve të thjeshtë blerjen e një apartamenti me të ardhurat e mjera që marrin dhe varfërinë e ulur këmbëkryq në çdo familje shqiptare.
Shqipëria fuqi prodhuese dhe eksportuese në rajon, si një prioritete madhor i Partisë së Lirisë, do të realizohet në mënyrë të padiskutueshme përmes këtyre masave shumë të qarta dhe të studjuara thellë profesionalisht të Programit politik dhe ekonomik të Shqipërisë Madhështore :
Do të ulet numri i shkallëve të ndryshme tatimore.
Vendoset taksa e sheshtë 10% mbi kapitalin, mbi të ardhurat nga puna, me përjashtim të 50 mijë lekëve të para nuk do tatohen.
Taksa e sheshtë 10% mbi të ardhurat jo nga paga.
Zero taksim për profesionet e lira dhe biznesin e vogël.
Tavani vjetor për tatim fitimin zero për biznesin e vogël.
Kufiri i përjashtimit nga TVSH do jetë 18 milion lekë xhiro vjetore.
TVSH do ulet në 15%.
Taksa e ndikimit në infrastrukturës do të ulet nga 8 përqind e çmimit të shitjes në 2% të preventivit.
Taksa 3% e strehimit social mbi çmimin e shitjes do të shfuqizohet.
Tarifa 1% e lejes së zhvillimit mbi vlerën e investimit do të shfuqizohet.
Tarifa e rivlerësimit të pronës do ulet nga 5% në 1%.
Akciza për birrën do jetë me dy fasho:
600 lekë hektolitri për prodhuesit mbi 200 mijë hektolitra në vit dhe 300 lekë hektolitri për prodhuesit nën 200 mijë hektolitra në vit.
Çmimi i pullave fiskale nga 17 euro për 1 mijë pulla do ulet në 3 euro për 1 mijë pulla.
Çmimi i pullave fiskale për verën do ulet nga 25 euro për 1 mijë pulla në 3 euro për 1 mijë pulla.
Për verën, do të unifikohet akciza e lidhur me gradacionin e alkoolit. Akciza do të lidhet me prodhues të mëdhenj dhe të vegjël.
Energjia elektrike për biznesin nga 18-24 lekë që është sot, do shitet në 6 lekë.
Taksa e shitjes së pronës ulet nga 15% në 2%.
Taksa e karburantit hiqet dhe në të gjitha pikat e shitjes së karburantit nuk mund të shitet karburant me ndryshim çmim plus/minus 10% me pompat e vendeve fqinje.
Bimët medicinale marrin një mbështetje preferenciale të fuqishme krahas ullirit, arrorëve dhe bimëve aromatike.
Punonjësit sezonalë të turizmit do të paguhen me një rrogë bazë.
Çdo titull strategjik i dhënë me koncesion anulohet.
Çdo shqiptar që vjen për të investuar në Shqipëri do të jetë 5 vite pa taksa kudo që të investojë, ndërsa për investimet në zonat malore 8 vite pa taksa.
Do krijohet bordi që do monitorojë dhe kompensojë dëmet e krijuara nga lëkundjet e kursit të narko-euros.
Do krijohet fondi për mbështetjen, mbrojtjen dhe nxitjen e eksporteve.
Për të rinjtë, zero sigurime shoqërore dhe shëndetësore për 12 muajt e parë të punësimit. Çdo i ri nën 30 vjeç.
Përjashtim nga tatimi mbi të ardhurat gjer në moshën 25 vjeç.
Stimuj fiskalë dhe mbështetje financiare për investitorët nën moshën 35 vjeç që duan të investojnë në startup-e dhe inovacion.
Mbështetje e fortë e arsimit profesional dhe ekselencave të tij për biznesi.
Për zonjat dhe gratë, zero tatim fitimi për vitin e parë të biznesit. Subvencionim i sigurimeve shëndetësore dhe shoqërore për 4 muajt e parë, me kushtin që gjysma e të punësuarve të jenë femra dhe të rinj.
Kredi të buta bankare nga banka e zhvillimit me preferencë për gratë dhe krijimi i një fondi për mbështetjen e bizneseve të grave.
Do krijohen 4 zona të lira ekonomike në qarqet e mëdha të vendit në standardet më të mira, në të cilat nuk do mund të investojnë kompanitë me konto offshore.
Qeveria do bashkëpunojë ngushtë me biznesin për dixhitalizimin e të gjitha bizneseve.
Qeveria në bashkëpunim me sistemin bankar do të ndërmarrë bashkëfinancimin e vendosjes së paneleve diellore nga jugu në veri, paneleve fotovoltaike në mënyrë që në krye të 3 viteve të pagesës së qirasë, çdo shqiptar të marrë energjinë falas nga këto panele.
Startup-et dhe inovacioni do njohin një mbështetje të fuqishme nga Banka e Zhvillimit.
Kompanitë “Made in Albania” do të jenë përfitueset e para nga financimi buxhetor i proceseve të dixhitalizimit.
Me votat tona plebishitare ta kthejmë 11 Majin në një Fitore Madhështore për Shqipërinë tonë Madhështore, që në radhë të parë është Shqipëria fuqi prodhuese dhe eksportuese në rajon!
VOTO ILIR METAJ në Qarkun Tiranë!
VOTO NR.1 Koalicionin “PD-Aleanca për Shqipërinë Madhështore”
