Brukseli, shuplakë Shqipërisë: STOP abuzimeve me lëvizjen pa viza
Për 2017-n, nga 26 mijë kërkesa azili nga të gjitha vendet e Ballkanit, gjysma e tyre janë nga qytetarë shqiptarë. Në fund të vitit, raporti për pezullimin e përkohshëm
Komisioni Evropian deklaron se nga 26 mijë kërkesa azili nga gjithë vendet e Ballkanit Perëndimor gjatë këtij viti, gjysma janë shqiptarë. Zëdhënësja e Komisionit Evropian, Tove Ernst, tha se nga shtetet anëtare nuk ka mbërritur asnjë kërkesë në Bruksel. Sipas saj, Unioni do që të mbajë liberalizimin e vizave, por është i domosdoshëm reagimi i vazhdueshëm i autoriteteve shqiptare që askush të mos e përdorë për abuzim.
Burime të ndryshme kanë bërë të ditur, se Franca dhe Holanda nuk përjashtojnë rivendosjen e përkohshme të regjimit së vizave për shtetasit shqiptarë për shkak të rritjes së numrit të atyre që abuzojnë me lëvizjen e lirë në zonën “Shengen”. Ne e dimë që shtetet anëtare të Bashkimit Evropian kanë miratuar më 27 shkurt rishikimin e mekanizmit të monitorimit të heqjes së vizave, që e bën më të thjeshtë rivendosjen e përkohshme të vizave. A kanë njoftuar autoritetet franceze dhe holandeze Komisionin Evropian për një shqetësim në rritje dhe a ekziston rreziku që Komisioni të aktivizojë këtë mekanizëm?
“Së pari, duam të nënvizojmë, se lëvizja e lirë është një element shumë i rëndësishëm i integrimit evropian të vendeve të Ballkanit Perëndimor. Falë lëvizjes së lirë intensifikohet kontakti midis qytetarëve të Ballkanit me qytetarët e Bashkimit Evropian. Liberalizimi i vizave nxit gjithashtu edhe mundësitë për të bërë biznes për qytetarët e Ballkanit. Pra, është një parim të cilit ne i kushtojmë shumë rëndësi. Por, kjo e drejtë e fituar nga vendet e Ballkanit shoqërohet me detyrime dhe përgjegjësi. Qytetarët e vendeve të Ballkanit kanë të drejtë të rrinë për një periudhë të caktuar në territorin e BE-së, por nuk duhet abuzuar me këtë të drejtë për të kërkuar azil. Deri tani, nuk kemi marrë njoftim nga asnjë shtet anëtar, por vazhdojmë të monitorojmë nga afër situatën. Siç ju referuat dhe ju, kemi mekanizmin e pezullimit të përkohshëm të lëvizjes së lirë dhe raporti i radhës do të prezantohet në fund të këtij viti”.
Cilat janë shifrat aktuale që posedoni për azilkërkuesit nga Ballkani? Duket se ka një rënie të kërkesave nga azili për 2017, por sërish qytetarët shqiptarë renditen midis atyre problematikë për abuzimin e zonës “Shengen”? Cili është mesazhi juaj për autoritetet shqiptare për të trajtuar këtë çështje?
“Sipas shifrave që disponojmë deri në verë, rezultojnë se për 2017-n ka 26 mijë kërkesa azili nga të gjitha vendet e Ballkanit dhe gjysma e tyre janë bërë nga qytetarë shqiptarë. Ne jemi në kontakt direkt me autoritetet shqiptare dhe e vlerësojmë që kjo çështje shihet me vëmendje. Nga njëra anë, kjo duhet trajtuar në nivelin kombëtar përmes fushatave të sensibilizimit për të informuar të gjithë qytetarët për të drejtat dhe detyrimet, por nga ana tjetër duhet punuar për të luftuar rrjetet e trafikantëve, që ndihmojnë qytetarët për të lëvizur brenda Bashkimit Evropian. Duhet të trajtohet çështja e trafiku ilegal, kërkesave të azilit, si dhe bashkëpunim për personat në situatë të paligjshme që kthehen në vendin e origjinës. Këto janë çështje për të cilat autoritetet mund të punojnë. Ne duam që të mbajmë liberalizimin e vizave, por nuk duhet të ketë dhe nuk mund të ketë abuzim”.
Gjatë prezantimit të masave të reja për forcimin e monitorimit në zonën “Shengen”, komisioneri Avramopoulos vuri theksin te përshpejtimi i rikthimit të atyre migrantëve që qëndrojnë ilegalisht në territorin e Bashkimit Evropian. A përfshihen këtu edhe qytetarët e vendeve të Ballkanit?
“Kthimi i personave që qëndrojnë ilegalisht në territorin e BE-së është një element shumë i rëndësishëm i politikës sonë aktuale të migracionit. Ata që kërkojnë azil dhe s’kanë të drejtë për këtë dhe ata që qëndrojnë ilegalisht duhet të kthehen. Ne duam që procesi i kthimit të jetë më efikas në bashkëpunim me vendet që kanë nënshkruar marrëveshjen e riatdhesimit. Dhe kjo përfshin sigurisht edhe vendet e Ballkanit, por në këtë kontekst ne kemi bashkëpunim më pozitiv me këto vende”.
Erisa Zykaj, “ABC News”
