“Nëse vazhdon kështu në shtator duhet me e mbyll”, biznesi në Shëngjin drejt falimentimit.
“Kam përgjysmuar punëtorët”, sezoni i gjen operatorët turistik në Shëngjin në kulmin e krizës.
KOMUNIKIMI I KRYETARIT TË PARTISË DEMOKRATIKE, LULZIM BASHA, ME BIZNESET DHE HOTELIERËT NË SHËNGJIN
Shëngjini është një nga qytetet e goditur rëndë nga dështimi i qeverisë në menaxhimin e krizës ekonomike që pasoi pandeminë. Kryetari i Partisë Demokratike, Lulzim Basha, u takua me disa biznese në Shëngjin, të cilët shohin se e kanë falimentimin në prag. Dyqanet bosh, hotelet bosh, lokalet bosh, janë treguesi i një krize të rëndë, që po përkthehet në largimin e njerëzve nga puna, veçanërisht në sektorin e turizmit. “Shumë vështirë, shumë vështirë. Domethënë nuk e di. Ka rënë krejt. Deri tani që unë e kam mbajtur hapur, jam detyruar ti paguaj punëtorët nga xhepi. Llogarite domethënë sa dobët kemi qenë”, u shpreh njëri nga operatorët turistikë, i cili u pasua nga një tjetër i cili e parashikonte me pesimizëm të ardhmen. “Hajt, do ta shtyjmë edhe këto dy muaj, por nëse do vazhdojë kështu, në shtator ose do e lëshoj me qera ose ta mbyll komplet” – tha pronari i një hoteli. “Për të bërë këtë lloj shërbimi duhet rreth 40 veta. Aktualisht e kam përgjysmuar se futja e pandemisë, e kështu dhe jam rreth 15 veta. Edhe këto i marrim kështu fundjavës i punësojmë, vetëm fundjavës”, tha pronari i një lokali, ndërsa një tjetër iu referua ndihmës nga shteti që i ka munguar deri më tani. “Po rezistoj, por ne kemi nevojë për likuiditet, po likuiditet nuk ka. Për me i pagujt faturat, i pyesim bankat, jo s’kemi thonë, vetëm për paga punëtorësh”. Gjatë qëndrimit në Shëngjin, kreu i opozitës u takua me disa operatorë turistikë, të cilët treguan gjendjen e rëndë të turizmit dhe papunësinë në rritje, për shkak të mungesës së ndihmës nga qeveria dhe keqmenaxhimit të situatës së pandemisë. “S’kanë me çfarë t’i paguajmë, se s’kanë lekë as njerëzit, a kupton. Shikoje s’ka, s’ka njerëz fare. S’kanë as lekë me paguajt. Shumë dobët këtë vit”, u shpreh njëri nga operatorët turistikë. Pronari i një biznesi hotelerie u thotë se si shpresë të vetme shikonte turistët nga Kosova, pasi janë të vetmit që frekuentojnë këtë plazh dhe që japin frymën e mbijetesës për hoteleritë në këtë zonë. “Faleminderit vëllezërve nga Kosova që jemi në punë sot dhe Rrugës së Kombit që e ka sjellë turizmin në Shëngjin”, i tha ai zotit Basha, i cili pati rastin të shpjegonte ndryshimin mes tij dhe qeverisë aktuale në trajtimin e biznesit. Lideri i opozitës mbështeti kërkesat e operatorëve turistikë për një paketë të veçantë për turizmin, i cili ka marrë një goditje të rëndë nga anulimet e rezervimeve. Basha tha se kjo është klima më e keqe e 30 viteve, pasi qeveria e sheh biznesin vetëm për ta mjelë dhe që kjo do të ndryshojë shpejt. Ai u zotua se ky ndryshim do të vijë menjëherë me ardhjen e Partisë Demokratike në pushtet, me taksën e sheshtë që do të jetë 9%. “Një nga faktorët kryesor që duhet të ndihmoheshin me paketat, të ashtuquajtura, se janë gjysëm paketa. Sa na përket ne si opozitë, ne kërkuam shumë më shumë, e ngritëm zërin që taksat tuaja të shkonin për të ndihmuar konsumatorët, të shkonin për të ndihmuar operatorët dhe në tërësi operatorët ekonomikë të vendit, por edhe ato gjysmë paketa që u hartuan me qëllim gjoja për të ndihmuar ata që janë goditur më rëndë, siç është mes tyre industria e turizmit, nuk kanë dhënë asnjë efekt. Synimi ynë do të jetë që brenda një viti Shqipëria të jetë vendi me numrin më të ulët të lejeve dhe autorizimeve në Ballkan. Taksën e sheshtë 9%, kontributet shoqërore 18% dhe 2 masa që besoj, njëra është vendosur që është ulja e çmimit të naftës duke eleminuar taksën e qarkullimit të Ramës, që eshte 240 lekë për litër dhe kjo padiskutim që jep një efekt të jashtëzakonshëm lehtësues për ju dhe natyrisht do të shqyrtohet për bizneset prodhuese dhe për shtresat në nevojë”, theksoi kreu i opozitës.
