Avancon dekriminalizimi, ngec Tahiri

485
Heqja e mandatit të dy deputetëve është një hap përpara në procesin e dekriminalizimit, që drejtohet nga një njësi e posaçme në Prokurorinë e Përgjithshme. E njëjta strukturë mbulon edhe shkëmbimet e informacionit me autoritete të vendeve të tjera, ku më kryesorja është dosja “Tahiri – Habilaj” për trafik narkotikësh drejt Italisë. Ky hetim, pas hapave të para në tetor-nëntor, tashmë duket se ka ngecur. Ish-ministrit të Brendshëm iu rikthye edhe pasaporta e bllokuar, ndërsa një sipërmarrës i arrestuar me 863 mijë euro dhe disa patenta të Tahirit, fitoi lirinë. Ndërkohë dje prokurorja e Përgjithshëm, Arta Marku dhe ambasadori italian në Tiranë, Alberto Kutillo diskutuan mbi forcimin e mëtejshëm të bashkëpunimit ndërmjet dy vendeve. Sipas njoftimit zyrtar, Shqipëria e konsideron Italinë një partner shumë të rëndësishëm në luftën kundër krimit të organizuar dhe trafiqeve. Në këtë kuadër, gjatë takimit, kryeprokurorja shprehu bindjen se Prokuroria Shqiptare dhe agjencitë ligj-zbatuese italiane do të intensifikojnë koordinimin për hetime të përbashkëta dhe goditjen e grupeve kriminale që operojnë ndërmjet dy shteteve. Shefja e organit të akuzës falënderoi diplomatin italian për angazhimin e tij personal dhe të vendit të tij për nxitjen dhe kontributin në hartimin e Reformës në Drejtësi. Marku theksoi rëndësinë e procesit të Vetingut në sistemin e drejtësisë në Shqipëri, duke u shprehur se forcimi i integritetit të prokurorëve dhe gjyqtarëve do të ndikojë edhe në rritjen e mëtejshme cilësore të luftës kundër krimit të organizuar dhe trafikut ndërkombëtar. Një tjetër temë e rëndësishme diskutimi ishte zbatimi i plotë i ligjit “Për Dekriminalizimin”. Ambasadori italian shprehu gatishmërinë për të bashkëpunuar me autoritetet shqiptare për realizimin në kohë sa më të shpejtë të procesit të verifikimit të integritetit të zyrtarëve shqiptarë.
Sigal