Diplomati dhe anëtari i Partisë së Lirisë Agim Nesho ka publikuar një shkrim në “Fox News” për kryeministrin Edi Rama, duke e cilësuar si “Ramaduro”, një krahasim me Nicolás Maduron, presidentin e Venezuelës.
Më poshtë shkrimi i tij i plotë
Nga Agim Nesho
Njihuni me Ramaduron: Autokrati progresist i Evropës, i trajnuar nga Sorosi dhe armiku i Trumpizmit
Ndërsa Europa pretendon se mbron demokracinë, në heshtje po fuqizon autokratë si kryeministri shqiptar Edi Rama. I zgjedhur për mandatin e katërt me një shumicë të fuqishme që mund të ndryshojë Kushtetutën, Rama njihet nga kritikët si “Ramaduro” i Evropës, një krahasim me Nicolás Maduron e Venezuelës për shkak të korrupsionit të dyshuar, tendencave autokratike dhe mjeshtërimit në mashtrimin politik.
Ish-dishepull i George Sorosit dhe “Shoqërisë së Hapur”, Rama është shndërruar në një kameleon politik, duke modeluar imazhin e tij sipas interesave të elitave globale dhe sundimtarëve rajonalë.
Nën ndikimin e kryeministres italiane Giorgia Meloni, në përputhje me presidentin turk Recep Tayyip Erdoğan dhe mbështetje për presidentin francez Emmanuel Macron për shkëmbim të influencës në Ballkan, Rama siguroi mandatin e katërt me zgjedhje që shumë i quajnë të manipuluara – diçka e papranueshme për një anëtar të NATO-s dhe shtet kandidat për BE.
Rama erdhi nga pozicioni i përfaqësuesit të Shoqërisë së Hapur në Tiranë dhe u bë lider i një vendi me një prej trashëgimive më të rënda komuniste në Evropë. Kritikët e përshkruajnë si një narcizist dhe anarkist, produkt i ndikimit post-komunist të Sorosit në Evropën Lindore. Ai përqendroi pushtetin në Shqipëri, ndërkohë që promovonte iniciativën e mbështetur nga Sorosi “Ballkani i Hapur”. Kohët e fundit ka marrë rolin e socialisti progresist që punon kundër iniciativave të epokës Trump në Evropë.
I njohur për retorikën anti-Trump, përfshirë deklaratën e tij të famshme në CNN dhe Foreign Policy, ku e quajti Trump “turpin e qytetërimit tonë” — Rama u bë i preferuari i elitave evropiane dhe demokratëve amerikanë. Mbijetesa e tij politike ka varej nga përshtatja me rendin anti-Trump, edhe pse udhëheqja e tij brenda vendit po shkon drejt autoritarizmit.
Sot, ndërsa Europa përballet me një botë multipolare dhe sfida komplekse gjeopolitike, ajo në rritje toleron, madje edhe përqafon udhëheqës si Rama. Pse? Sepse ai deklaron besnikëri ndaj “vlerave evropiane”, pavarësisht se drejton një shtet që kritikët e quajnë narco-shtet, të ndërtuar mbi krimin e organizuar dhe manipulimin e zgjedhjeve.
Rama përfaqëson versionin evropian të modelit Chávez-Maduro: një autokrat i majtë me fjalë progresiste, që ushtron pushtetin me pak respekt për normat demokratike. Ai është pjesë e stabilokracisë që po e prek Ballkanin — regjime të toleruara për shkak të qetësisë rajonale, edhe pse shkatërrojnë vlerat që Europa pretendon të mbrojë.
Përpjekja e sekretarit amerikan të Shtetit, Marco Rubio, për të ndaluar rinovimin e kontratës së Chevron në Venezuelë është një shembull guximtar i drejtimit me parime, duke i mohuar legjitimitetin dhe burimet regjimeve autoritare. Amerika duhet të aplikojë të njëjtën qartësi edhe ndaj Ballkanit.
Edhe shumë shqiptarë tani e quajnë liderin e tyre “Ramaduro”, një sinjal i dëshpëruar për ndihmë nga SHBA për të rikthyer demokracinë. Qëndrimi amerikan duhet të jetë një thirrje zgjimi për një Evropë që është bërë e qetë me bashkëjetesën me regjime mafioze të rrënjosura në korrupsion dhe shtypje. Europa nuk mund të justifikojë mbështetjen e autokratëve vetëm sepse kritikët e tyre janë konservatorë ose afër presidentit Trump.
Është koha që diplomacia amerikane të ndërmarrë hapa konkretë. Kjo do të thotë presion më i madh ndaj udhëheqjes shqiptare, mbështetje publike për zgjedhje të lira e të ndershme dhe një mesazh të qartë: Përputhshmëria me vlerat perëndimore matet me veprime, jo me deklarata boshe.
*Ambasador Agim Nesho është autor, diplomat dhe figurë politike e njohur shqiptare. Aktualisht shërben si President i Këshillit Shqiptar për Marrëdhëniet me Jashtë.
