Që herët ka nisur fushata për dy partitë kryesore, flitet me entusiazëm se kanë filluar të ndezin motorrët e fushatës, duke shpallur që tani fitoret e sigurta. Edi Rama deklaroi në mbledhjen e Asamblesë së PS-së, se do mari i sigurt mbi 84 mandate deputetësh, që i sigurojnë mandatin e katërt të qeverisjes! Ndërsa lideri i ngujuar i PD-së, i siguroi militantët e tij, se shtatori i ardhshëm PD-në do e gjejë në pushtet! Të gjithë fërkuan duartë gjithë gëzim! Dikush nga të deleguarit u shpreh me enthusiazëm, “Rroftë doktori! Vetëm ai na çon në fitore, në pushtet”!
Sigurisht, propaganda elektorale kërkon t’i karikojë militantët dhe elektoratin e vetë, për të rritur besimin në fitore të secilës forcë politike, por arritja e këtyre objektivave, kërkon jo vetëm dëshirë dhe shpresa se kundërshtari do ua japi fitoren në tavolinë, duke u dhënë një qeveri teknike, si ajo e Lulzim Bashës në vitin 2017, ku PD-ja kishte gjysmën e qeverisë teknike me ministrat e saj, njeri nga ata ishte dhe Gazmend Bardhi, dhe megjithatë, ajo edhe në atë rast pësoi humbjen e saj më të thellë! Apo Edi Rama do dorëhiqet si dikur Fatos Nano, duke i thënë Saliut, “Urdhëro çelsat e pushtetit”! Jo, kjo s’ka për të ndodhur kurrë.
Të habit dhe një fakt tjetër: lideri Sali Berisha, nga një anë deklaron fitoren e sigurt të PD-së në zgjedhjet e ardhshme dhe nga ana tjetër po ashtu, justifikohet se, “Me Edi Ramën nuk ka zgjedhje të lira dhe të ndershme”! Po atëhere, si do bëhet?! Edi Rama aktualisht është Kryetari i PS-së dhe Kryeministri i votuar i Shqipërisë dhe Saliu me skuadrën e tij që udhëheqin PD-në, po të jenë të zot të frymëzojnë masën e popullit, të mbrojnë deformimin e votës dhe ta mundin Edi Ramën, vetëm kështu, PD-ja me liderin “Non grata”, dhe me mbështetësit e tij mund të vijnë në pushtet.
Ndërsa PS-ja dhe Edi Rama, duket se dhe ata e kanë marrë lehtë fitoren e mandatit të katërt. Të mos mendojnë se kanë përballë vetëm një opozitë të përçarë dhe të dobët, as dhe për liderin e saj “Non grata”, nga sot i shpallur dhe “I pandehur” nga organi i akuzës SPAK-u për korrupsion pasiv. Përballja e tyre nuk është vetëm opozita ashtu copa, copa dhe në pikë të hallit siç është, por të mendojnë se kanë përballë dhe një opozitë më të fortë e më të egër, që është populli, votuesit, janë pensionistat, një kockë e fortë, që nuk kapërdihet lehtë, me arsyetimet dhe mashtrimet, se gjoja për pensionistat Kryeministrit po i digjet xhani dhe po bëhet një reformë që do i nxjeri ata nga selameti. Nuk është lehtë të mashtrohen këta 700 e ca mijë burra e gra që kanë dhënë djersën e gjakun për këtë Shqipëri, që brezi i pushtetarëve po gëzon sot dhe që vota e revolta e tyre do të jetë një tërmet, që do e trondisë thellë qeverisjen e vendit nga çdo forcë politike që do jetë.
Llogari-dhënie e fortë për partinë në pushtet, do të jetë dhe përballja me skandalet e korrupsionit që ka përfshirë qeverisjen në të gjitha nivelet, nga Bashkitë dhe deri në nivelet më të larta. Nuk është vetëm deklarimi i mbështetjes ndaj drejtësisë, apo dorëzimi i të korruptuarve për hetim, si mburrje se pushtetarët e parë i mbronin ata duke i mbajtur nën sqetull. Llogari-dhënia kërkon hesap më të madh, pse ndodhin skandale të tilla dhe përgjegjësia nuk është vetëm e atij që e kryen fajin, por dhe e drejtuesve të niveleve të larta, qoftë dhe Kryeministri që i deklaron si sukses!
Hallin më të madh e ka opozita, konkretisht PD-ja me kryetar Sali Berishën, për faktin se me këtë kryetar të shpallur “Non grata” nga faktori ndërkombëtar, SHBA dhe Mbretëria e Bashkuar, me një akuzë shumë të rëndë, të deformimit të demokracisë dhe korrupsion të lartë, duke përfshirë bashkëpuntorë dhe familjarë të tij, krijon një pabesueshmëri në votuesit për të qenë në krye të politikës dhe të shtetit shqiptar. Akoma më tepër, i deklaruar së fundi dhe “I pandehur” nga SPAK-u, si organ i akuzës për korrupsion pasiv, të përfshirë deri dhe familjarë të tij, proçese, të cilat e kanë çuar deri në arrest shtëpie. Sado të luftojnë drejtuesit dhe militantët e kësaj partie për të krijuar një frymë besimi në masën e votuesve, është gogoli “Non grata” dhe damka “I pandehur”, që i tremb njerëzit dhe është vështirë të krijohet frymë në masën e votuesve dhe besim për ndryshime politike.
Sado presione t’i bëhet organeve të drejtësisë, që sot më shumë se kurrë ato janë të pavarura, me protesta nga militantët dhe pasuesit që mbështesin sy mbyllur liderin e tyre, hetimi dhe gjykimi janë proçese të domosdoshme, që dhe lideri i tyre ka interes për të sqaruar e për të vënë në vend pastërtinë e figurës së tij, nëse është i pastër e i ndershëm ashtu siç deklaron ai. Pse kanë frikë nga gjykimi dhe i tremben drejtësisë?!
Për fushatën e zgjedhjeve të ardhshme, të dyja partitë kryesore caktuan shtabet drejtuese me të deleguarit kryesor për 12-të Qarqet e vendit. Sigurisht, u caktuan njerëzit më të besuar dhe më me përvojë në punët e partisë e të vendit. Diskutimi i tyre ka përfshirë këto ditë dhe debatet në studiot televizive, duke i vënë përballë njeri-tjetrit, sipas qarqeve përkatëse. Nuk bëhet fjalë për aftësitë intelektuale, apo për përvojën dhe kontributin e dhënë në karrierën e tyre si politikanë. Por për PD-në, koha e gjatë në opozitë, ka bërë që shumë nga këta drejtues si, në Tiranë, në Vlorë, Elbasan, Shkodër, Kukës, Durrës, Korçë, Fier e tjera, kanë humbur ndjeshëm disa fushata politike dhe ato lokale, bile disa prej tyre nuk i ka votuar as qyteti apo lagja ku banojnë dhe komandohen të fitojnë zgjedhjet në Tiranë, Shkodër, Fier, Vlorë, Korçë, Gjirokastër e tjera. Aq më tepër, fushata e tyre do ketë një tra të fortë me tabelën, “Stop”, kur të thuhet se këtë forcë politike e drejton një kryetar “Non grata” dhe “I pandehur” nga organi i akuzës, me emrin Sali Berisha!
Dikur, dëgjuar nga gojdhënat, thuhej se, u zhduk një fshat i tërë, se kuçedra i preu burimin e ujit! Kjo po ndodh dhe me PD-në, pavarësisht sherreve të brendshme që e kanë coptuar e përçarë në pjesë të vogla, por është dhe Berisha që me damkën “I pandehur” dhe “Non grata” i ka prerë ujin si kuçedra për të mos mbijetuar! Ky lider, tashmë jo pa ndikim, po tërheq zvarrë dhe forcën e tij politike, PD-në, duke e ngarkuar, veç të tjerave dhe me hallet e kusuret e tij të pafund!
Dobësimi i opozitës, sigurisht çon ujë në mullirin e qeverisjes së PS-së, të cilët çdo ditë e më shumë përjetojnë sigurinë e fitores. Por të themi të drejtën, bashkë me dobësitë, qeveria aktuale ka bërë dhe disa punë të mira, që s’duhen mohuar si, në infrastrukturë me goxha investime e përmirësime, janë ndërtuar qindra shkolla të reja në Tiranë e në rrethe të tjera, turizmi ka marrë një hov të ndjeshëm, politika e jashtme e Shqipërisë e ka bërë atë faktorë të rëndësishëm në rajon e në Europë, dhe të gjitha këto e të tjera, kanë çuar dhe në një rritje të ndjeshme të të ardhurave e të nivelit ekonomik, ku tregues janë rritja e ndjeshme e rrogave në administratën shtetrore dhe në biznesin privat.
Por enthusiazmi i parakohshëm, bëhet pengesë për t’i bërë një analizë më të thellë situatës politiko-shoqërore, ndoshta që tani sa s’është vonë, sepse dielli i zgjedhjeve duket që kur lind.
