“Politikani bëhet burrë shteti kur fillon të mendojë për brezat e ardhshëm dhe jo për zgjedhjet e ardhshme”U.Çërçilli
Komisioni Qëndror i Zgjedhjeve është gjithherë në punë gjatë tërë viteve dhe jo vetëm kur afrohen zgjedhjet e radhës.Natyrisht veprimtaria e tij dëndësohet kur barra është më e madhe dhe zgjedhjet janë jo shumë larg.Politikanët përse nguten aq shumë duke dalë shpesh edhe para KQZ-së në kohë?!
”Të ndezim bubullimthi motorët…!”
Këtë fjali e ndeshim gjithandej shumë e shumë muaj më përpara, kur partitë politike shpejtazi vënë në lëvizje makinerinë e tyre.Edhe vetë këto habiten se ç’kanë broçkullitur p.sh. katër vjet më pare. Ja disa nga ato “xhevahire”:”Sot votohet për të nesërmen” (po pse, kur është votuar ndonjëherë për të djeshmen!?).”Më 25 prill kthejmë vajzat dhe djemtë në Shqipëri”(është thënë më 9.4.2021).Një tjetër politian i rënë nga karrigia e pushtetit shkruan më 12.4.2021:”Sekti i Rilindjes më 25 prill damkoset si humbësi dhe shkatërrimtari i zgjedhjeve të lira e të ndershme”. Po në këtë datë një tjetër ‘thesar’””më 26 prill ndalim shpopullimin.Vota për ndryshim i jep fund tranzicionit”. “Edi Rama do humbë thellë sa nuk do të gjejë udhën për t’u kthyer në Tiranë natën e 25 prillit (31.3.2021).”Në Tiranë L.S.I.-ja do marrë 11 mandate” (23.04.2021). Po fushata kishte nismuar qysh më tej në kohë:” më 25 prill, referendum popullor, që do të shpartallojë Rilindjen në çdo qendër votimi”(24.01.2020).”Mbas 25 prillit kryeministri do të kërkojë azil” (2.2.2020). Kësaj i thonë ndiz motorët e mashtrimeve dhe shuaj semaforët e së vërtetave që gënjeshtrat të mos ndalen askund dhe nga askush.Nga këto qeshuri hasim shumë në shtypin e përditshëm dhe për çudi premtojnë për ato që kur kanë qenë në pushtet, nuk i kanë kryer vetë!Paska pasur të drejtë Bismarku kur është shprehur se “Nuk thuhen kurrë më shumë gënjeshtra se përpara zgjedhjeve politike, gjatë një lufte dhe mbas gjahut”.
Pse u dashkan bërë zgjedhjet?!
Jo rrallë theksohet se duhet rotacion politik.Ky term rrjedh nga latinishtja, çka do të thotë: ndryshim i pozitës, ndërrim i saj. Pra, përderisa do të ketë rotacion të rregullt periodik, le të bëhen zgjedhjet sa për të kaluar radhën, se kush do ta marrë qeverisjen e radhës,qenka paravendosur(!).Po mirëfilltazi dihet se ky zëvendësim pushtetesh kryhet vetëm në kutinë e votimit dhe jo me ato mitingje dhe fushata të papërmbajtshme dhe të ethshme elektorale.Në një libër, vite të mëparshme, kam shkruar edhe këtë epigram me titull”Etherëndë”:”Sa ethe, edhe vdekjesore, /ndeshim përditë në jetë,/ po më e rëndë më mizore,/është ajo:Ethja për pushtet!”.
Ne e dimë refrenin sesi vazhdon qysh të nesërmen e përfundimit të procesit si:”ne nuk fituam se na i vodhën votat; fituesit trumbetojnë se vendin e gjetëm trokë nga ata që ikën, ndaj triumfuam.”Melodia vazhdon e vazhdon… Mbas disa ditësh të tjera, pala humbëse do të kërkojë zgjedhje të reja, derisa…të fitojë ajo! Sa herë na është thënë në mjekësi se kush diagnostikon mirë, do të mjekojë mirë.Pra kur çdo parti apo koalicion i tillë të arrijë të gjejë”shkakun e diagnozës” dhe të ketë sjellë realisht diçka të re e më të realizueshme për popullin.Për premtime, pa patur kurrgjë në torbë, ashtu do të vërtitesh rreth vetvetes, duke acaritur dhe kolapsuar njerëzit e thjeshtë që shpesh numërojnë qindarkat dhe gëzojnë kur muaji ka 30 ditë! Shpesh edhe “oratorët” e tribunave , as vetë nuk i besojnë marrëzitë e tyre, ndaj kalojnë jo rrallë në veprime arbitrare, pa pyetur për pasojat brenda e jashtë vendit.Po”gjuha politike është krijuar-shkruan Oruell, për të bërë që gënjeshtrat të tingëllojnë të vërteta dhe vrasja të bëhet e respektueshme”, vazhdon ai.
Po përse i nxirrni bojën vetes more politikan(uc)ë duke u bërë objekt humori të gjallë dhe të barseletosurish.”Sekreti i madh i pushtetit është të mos duash kurrë të bësh më shumë nga ç’mund të bësh”(Henrik Ibsen).
A është bërë ndonjëherë bilanci i punëve?
Kush nga ne gjer më sot ka lexuar, dëgjuar apo parë se kur dalin në fushatën zgjedhjesore (elektorale) dhe fillojnë duke qindfishuar planet për elektoratin, ose më saktë për taksapaguesit(siç jemi ne),folësit ta kenë nisur fjalën kësisoj nga tribunat”madhështore”: Ata të na thonë ne se ju kemi premtuar se në fshatin apo trevën tuaj që do të bënim 10 vepra apo punë të mira për bashkësinë e këtushme, ndërsa sot, ju raportojmë se ne përmbushëm 7 prej tyre.Tani këtu u japim fjalën e nderit se veç atyre të trijave që s’i realizuam dot, do të shtojmë edhe ca vepra të tjera më të mëdha.Kjo s’ka ndodhur asnjë herë, askund.Të tilla tabela përmbledhëse mos prisni se doemos për plotësimin e thesit të premtimeve do ndikojë edhe buxheti, edhe Qeveria…
Shpenzime që trullosin gjithkënd
Kur vite të shkuara u ndodh në Shqipëri, para zgjedhjeve parlamentare me skena të pakundpara, një i huaj në Sheshin “Skënderbej” na tha:” Pse harxhoni kaq shumë kohë, para që mund t’i shpenzoni për tjetër gjë?Ne në përgjithësi,vazhdoi ai, mendojmë pesë minuta para se të shkojmë para kutisë së votimit se për cilin do votoj…”
Dikush m’u shpreh një ditë , se le të bëhen takime politike të pakta e të kufizuara ballafaqimesh me elektoratin, apo edhe mund të jepen zotimet p.sh. në masmediat, periodikisht, apo me tabela të posaçme në lagjen, fshatin apo njësinë vendore, se boll u shurdhuam me tamtame, ngjirje, ekzaltime histerike të shfrenuara. Pale kur kemi edhe konfrontime fizike, jo vetëm tek ne. Që të shuhen këto lloj semaforësh të psikozës së zgjedhjeve duhet shumë punë dhe përsëri do të jetë larg dita për qetësi publike.Duhet të kuptojmë se jo rrallë vuajmë nga “humbja e besimit” të cilën ne bashkërisht ta mposhtim me punë , korrektësi dhe ndershmëri…
