Për foshnjat dhe fëmijët e vegjël, dremitjet janë një pjesë e rregullt dhe e domosdoshme e jetës së përditshme dhe thelbësore për rritjen, zhvillimin dhe shëndetin e përgjithshëm. Por çfarë ndodh me të rriturit – a duhet të dremisim edhe ne?
Ka pasur një diskutim prej dekadash nëse dremitja te të rriturit është përfundimisht e mirë për shëndetin. Dremitja sigurisht që mund të jetë e dobishme, nëse bëhet në mënyrë korrekte dhe në kushtet e duhura (koha e ditës, kohëzgjatja e gjumit, e kështu me radhë). Ja çfarë thonë ekspertët e gjumit:
Sa kohë duhet të flini? Përpiquni të dremisni për 20-30 minuta, rekomandon The National Sleep Foundation. Një sy gjumë 20-minutësh (vendosni alarmin!) ju siguron gjumë të lehtë pa u zhytur në fazat më të thella të gjumit – kjo ju ndihmon të ndiheni të freskët dhe të mos keni probleme me gjumin natën.
Megjithatë, fjetja që zgjat rreth një orë e gjysmë ka gjithashtu përfitime, veçanërisht për punonjësit e turneve dhe të urgjencës. Dremitjet më të gjata mund t’ju bëjnë të ndiheni të lodhur dhe të përgjumur, por një sy gjumë 90-minuta mund ta lejojë trurin të flejë gjatë gjithë ciklit të gjumit.
Kur është koha më e mirë e ditës për të marrë një sy gjumë? Nëse keni nevojë të flini, koha më e mirë është pasditja herët. Dremitja shumë afër kohës së gjumit ose çdo orë pas orës 15.00 mund të ndikojë te cilësia e gjumit natën.
