Disa këshilla të thjeshta se si t’ja filloni me gatimin, kur nuk keni as idenë më të vogël.
1. Filloni me recetat e thjeshta
Nuk mund të pretendoni të gatuani byrek apo bakllava vetëm sepse gjetët një recetë në Google. Nuk është aq e thjeshtë sa duket dhe gjasat për dështim janë jo të vogla. Filloni me receta që konsistojnë vetëm në bashkimin dhe përizerjen (ose grirjen) e disa përbërësve.
– Provoni pancakes. Janë gjëja me e thjeshtë dhe ka 1001 mënyra për t’i bërë. Dy prej tyre janë:
– 1 banane e shtypur, tërshëre dhe mjaltë. I grijmë të tre përbërësit bashkë dhe e vendosim përbërjen në tigan. Tiganin e kemi lyer paraprakisht me pak vaj, ose gjalpë.
– E njëjta procedurë, por vetëm me 2 banane, 1 vezë dhe pak ekstrakt vaniljeje.
– Një ide tjetër janë qoftet me perime. Ju duhen: 1 patate, 2 kunguj, 1 karrote, ½ qepë, 2 thelpinj hudhër. Grijmë një nga një përbërësit, i përziejmë bashkë me 2 vezë. Shtojmë kripë, majdanoz dhe piper të zi. Më pas, u japim forma, i lyejmë me miell dhe i skuqim në vaj.
2. Shpërbleni veten
Postojeni në Instastory, shënoni recetën në një bllok ose notes të telefonit tuaj. Kështu ndjeni se keni arritur diçka sado të vogël dhe e keni recetën të ruajtur si “tuajën” në çdo rast. Lërini miqtë dhe të afërmit t’i provojnë gatimet e tua. Me siguri do t’ju mbështesin edhe nëse nuk keni bërë më të mirën.
3. Dekoroni
Pjesa më e bukur e gatimit, sidomos kur sapo ja ke nisur është zbukurimi i pjatave. Disa luleshtrydhe të vendosura bukur tek ëmbëlsira, pak borzilok tek makaronat. Çdo gjë bëhet e këndshme për sytë dhe të sjell një ndjenjë sado të vogël arritjeje.
4. Kërkoni mirë dhe shpejt
– Për receta të shpejta e të sqaruara hap pas hapi me foto shkoni në Pinterest. Krijoni një board me emër Easy Fast Recipes a diçka të ngjashme dhe ruajini aty recetat tuaja.
– Instagrami, gjithashtu, ka një numër të madh vajzash e djemsh shqiptarë që postojnë receta fantastike tradicionale dhe jo vetëm. Gjithsesi, mjafton të kërkoni 2-3 herë për receta në Instagram dhe do ta keni explore-in e profilit tuaj të mbushur plot me të tilla.
5. Merreni lehtë
Roma nuk u ndërtua në një ditë dhe njëjtë do ndodhi dhe me aftësitë tuaja në kuzhinë. Mos harroni se praktika sjell përsosmërinë dhe përpiquni të gatuani më shpesh.
