Policia e Lushnjes ka arrestuar një 47-vjeçar, i cili ka kanosur me mjet prerës mjeken e qendrës shëndetësore në fshatin Ngurrëz e Madhe.
Në pranga ka rënë shtetasi G. K., banues në Ngurrëz e Vogël.
“Arrestimi i këtij shtetasi u bë pasi ka kanosur për shkak të detyrës me thikë shtetasen A. V., me detyrë mjeke pranë qëndrës shëndetësore në fshatin Ngurrëz e Madhe” njoftoi policia.
Shtetasi G. K mësohet se ka shkuar në zyrën e mjekes dhe ka kërkuar nga mjekja rimbursim për disa ilaçe që nuk janë për sëmundjen që ky shtetas është diagnostikuar dhe gjatë debatit e ka kanosur atë me thikë.
Materialet i kaluan Prokurorisë pranë Gjykatës së Shkallës së Parë Lushnje për veprën penale “Kanosje për shkak të detyrës”.