Damian Gjiknuri : Mbështesim me politika sociale shtresat në nevojë për të zbutur efektet e lëvizjes së çmimeve të ushqimeve

203
Sigal

Sekretari i Përgjithshëm i Partisë Socialiste, Damian Gjiknuri reagoi nga foltorja e Kuvendit ndaj opozitës për kërkesat e kësaj të fundit për heqjen e taksave për karburantin.

Gjiknuri deklaroi se, qeveria po mbështet shtresat në nevojë për të zbutur efektet e lëvizjes së çmimeve.“Opozita pas një krize të thellë të tyre politike gjetën një ‘casus belli’ për të filluar me radhë sulmin ndaj qeverisë. Pse është kjo dëshirë e madhe për të sulmuar qeverinë? Çmimet nuk kontrollohen nga qeveria shqiptare, zinxhiri ndërkombëtar i furnizimit është ndërprerë. Të gjitha këto janë të vërteta, të gjithë lexojmë dhe shikojmë situatën. Këtu fillojnë dalin dy togfjalësha nga fjalori i opozitës: hiqni taksat dhe grup i strukturuar kriminal. Të thuash duhen hequr taksat, këtë e preka si temë edhe javën e kaluar, do të thotë ta lësh qeverinë zbuluar për skenarë që ne nuk e dimë sesi do të zhvillohen. Parimi i heqjes së taksave nuk është që të përfitojnë të gjithë, puna është që të përfitojë i varfri. Të gjitha këshillat, ‘prudence’ e ekonomisë apo atyre që janë ‘responsible’ për aspektin e fiskut është e tillë: targeto njerëzit në nevojë, targeto të varfrit. Qeveria këtë po bën me politikën sociale po mbron shtresat më në nevojë”, tha Gjiknuri.

“Kishte protestues që ishin të ndjeshëm për efektet e çmimeve përpara se të dilnin masat e qeverisë. Qeveria reagoi dhe protestat u zvogëluan. Ju vajtët t’i hidhni ‘karburant’ por ju përzunë, sepse jo të gjithë janë për protesta politike. Gjiknuri theksoi se, pasi opozita ka dështuar të marrë mbështetjen me votë nga qytetarët, shpresa e saj e vetme është të bjerë qeveria.