Paralajmërohet sërish shtrenjtim i energjisë elektrike në Kosovë

126
Sigal

Zyra e Rregullatorit për Energji ka paralajmëruar shqyrtim të tarifave të reja të energjisë elektrike për vitin 2023 në Kosovë.

Kryetari i Bordit të ZRRE-së, Ymer Fejzullahu, theksoi në Komisionin parlamentar për Ekonomi, në dhjetor të vitit të kaluar, se kanë filluar shqyrtimin e jashtëzakonshëm të tarifave të energjisë elektrike.

Fejzullahu ka deklaruar se janë plotësuar të gjitha kushtet ligjore për këtë shqyrtim të tarifave.

Edhe pse nuk ka dhënë detaje se sa mund të shtrenjtohet energjia elektrike, ai theksoi se edhe ky vit do të jetë sfidues, pasi çmimet e energjisë në bursat ndërkombëtare janë tejet të larta.

“Kur është dorëzuar ky plan i performancës në nëntor të vitit të kaluar, siç e dini ZRRE-ja në atë kohë nuk e ka hapur shqyrtimin e jashtëzakonshëm.

Shqyrtimi i jashtëzakonshëm si një prej aktiviteteve që nuk mund të parashihet në kuadër të aktiviteteve dhe të planit të performancës, është edhe shqyrtimi i jashtëzakonshëm i tarifave, i cili edhe në vitin e kaluar ka ndodhur një herë, por edhe këtë vit domosdoshmërisht është duke ndodhur, për shkak se janë plotësuar kriteret e parapara me Ligj dhe ZRRE-ja në dhjetor të vitit të kaluar ka hapur edhe shqyrtimin e jashtëzakonshme të tarifave për vitin 2023”, ka theksuar Fejzullahu, duke shtuar se paralelisht me këtë proces është duke u bërë edhe shqyrtimi i rregullt pesëvjeçar i tarifave.

“Aktivitet për të cilën shumicën e vëmendjes e merr ZRRE-ja për çdo vit, është paraparë që të bëhet shqyrtimi i tarifave të energjisë elektrike dhe termike për vitin 2023, si një proces i rregullt, për të cilën ZRRE-ja e bën për çdo vit, për dy operatorët dhe për furnizuesin e rregullt që është KESCO”.

Duke paraqitur planin e punës për vitin 2023, ai është shprehur se prioritet gjatë këtij viti është edhe rritja e konkurrencës në sektorin e energjisë , por edhe tregu i përbashkët me Shqipërinë.

Gjatë diskutimeve në komision pati edhe një përplasje në mes deputetes Mimoza Kusari-Lila dhe kryetarit të Bordit të ZREE-së, Ymer Zejnullahu.

Deputetja Mimoza Kusari Lila ka kërkuar llogari nga ZRRE për gjendjen financiare në sektorin e energjisë dhe se a kanë dërguar letra për borxhet nga KEDS dhe KOSKO.

“Një prej problemeve kryesore sot është gjendja financiare e energjisë. Aktualisht a mundeni me na tregu se si është gjendja financiare në sektorin e energjisë. Ku janë letrat e juaja, çka keni bërë ju si rregullator dhe cila është gjendja financiare e rregullatorit. Çka keni ndërmarr për borxhet”, pyeti ajo.

Kryetari i Bordit të ZRRE-së Ymer Zejnullahu tregoi se kanë dërguar disa herë letra për borxhet.

Ai po ashtu u ankua për mungesën e një objekti për këtë institucion dhe se nuk kanë mundur që të bëjnë investime në objekte të huaja.

Edhe deputeti Pal Lekaj pati kritika sa i përket planit të performancës të ZRRE-së.

Ai u shpreh se me rritjen e energjisë do të dëmtohen edhe më shumë qytetarët.

“Sa i përket planit të performancës është një përshkrim i asaj që dëshironi të realizoni. Ky nuk është i saktë. Në asnjë rresht nuk e keni shkruar se cilat janë obligimet, sa është kostoja. Nëse e keni për konsumatorët, a nuk dëmtohen ata sidomos në stinë e dimrit.

Riparimet në dimër bëhen vetëm në gjendje të jashtëzakonshme, dhe jo që gjatë dimrit të ketë riparime e konsumatorët të jenë deri në 8 orë pa rrymë. Nëse shkoni te rritja e energjisë nuk e di se si do t’ia dalin qytetarët tanë”, ka thënë Lekaj./ MONITOR