Në Francë, kundërshtarët e reformave të pensioneve të presidentit Emmanuel Macron organizuan një raund të tetë grevash të mërkurën.
Veprimi erdhi ndërsa një komitet i përbashkët i senatorëve dhe ligjvënësve të dhomës së ulët po shqyrtonin projektligjin e diskutueshëm.
Kalimi i fundit në procesin legjislativ për rritjen e moshës së pensionit nga 62 në 64 vjeç po nxit në kulm tensionet politike dhe një pyetje kyçe: A do të komandojë ligji një shumicë parlamentare?
Sindikatat shpresojnë se demonstratat e mëtejshme në të gjithë vendin do të përforcojnë kundërshtimin masiv të punëtorëve ndaj planit, i promovuar nga Macron si qendror në vizionin e tij për ta bërë ekonominë franceze më konkurruese.
Takimi i shtatë senatorëve dhe shtatë ligjvënësve nga Asambleja Kombëtare (Dhoma e Ulët) do të përpiqej të arrinte një marrëveshje mbi versionin përfundimtar të tekstit.
Senati pritet ta miratojë të enjten, pasi shumica e tij konservatore është pro rritjes së moshës së pensionit, por situata në Asamblenë Kombëtare është shumë më e ndërlikuar.
Aleanca centriste e Macron humbi shumicën e saj në zgjedhjet legjislative vitin e kaluar, duke e detyruar qeverinë të llogarisë në votat e konservatorëve për të miratuar projektligjin.
Të majtët dhe ligjvënësit e ekstremit të djathtë e kundërshtojnë ashpër masën.
Kreu i republikanëve konservatorë, Eric Ciotti, i cili vetë ka një vend në Asamblenë Kombëtare, tha në gazetën Journal du Dimanche se “interesi më i lartë i kombit… na urdhëron të votojmë për reformën”.
Por ligjvënësit konservatorë janë të ndarë dhe disa po planifikojnë të votojnë kundër ose abstenojnë, duke e bërë të vështirë të parashikohet rezultati në Dhomën e Ulët.
Pa garanci për një shumicë, qeveria e Macron po përballet me një dilemë: Një votim pasdite të enjten në Asamblenë Kombëtare do t’i jepte më shumë legjitimitet projektligjit nëse miratohet, por ekziston rreziku që ai të refuzohet.
Një mundësi tjetër do të ishte përdorimi i një fuqie të posaçme kushtetuese për ta detyruar projektligjin në parlament pa votim. Por një veprim i tillë jopopullor do të shkaktonte kritika të menjëhershme nga opozita politike dhe sindikatat për mungesën e debatit demokratik.
