Qytetarë nga 27 vende evropiane do të zgjedhin anëtarët e rinj të Parlamentit Evropian, i cili më pas do të vazhdojë me emërimin e presidentit të tij si veprimin e parë pas zgjedhjeve të 6-9 qershorit.
Bashkimi Evropian shkon në votime nga e enjtja deri të dielën këtë javë në zgjedhje në të cilat partitë e djathta dhe të ekstremit të djathtë pritet të kenë rezultate pozitive.
Qytetarët e 27 vendeve të tij do të votojnë për një Parlament të ri Evropian prej 720 anëtarësh, 15 më shumë se në zgjedhjet e mëparshme.
Një nga vendimet e para të asamblesë së re do të jetë zgjedhja e kryetarit të parlamentit, një votim që kërkon një shumicë absolute.
Pas kësaj, hapi tjetër është emërimi i një presidenti për Komisionin Evropian, një vendim i marrë nga anëtarët e rinj të parlamentit.
E njëjta gjë vlen edhe për komisionerët aspirantë. Ata do të intervistohen nga eurodeputetët, të cilët do të vendosin nëse do t’i mbështesin apo refuzojnë.
Më pas, eurodeputetët do të marrin pjesë në hartimin e ligjeve të BE-së. Roli i tyre përfshin debatimin, ndryshimin dhe përfundimisht negocimin e propozimeve të bëra nga Komisioni Evropian së bashku me Këshillin Evropian.
Ndërsa as parlamenti dhe as këshilli nuk kanë të drejtë të iniciojnë një procedurë legjislative, ata mund t’i kërkojnë komisionit që ta bëjë këtë dhe të paraqesë një propozim.
Dy nga detyrat e tjera të mëdha të parlamentit janë miratimi i buxhetit të BE-së dhe shqyrtimi i politikës së jashtme. Ai gjithashtu duhet të shqyrtojë çdo zgjerim të BE-së dhe të gjitha traktatet e asociimit.
Parlamenti ka gjithashtu fuqinë të detyrojë komisionin të japë dorëheqjen duke miratuar një mocion censurimi.
