Këshilli i Sigurimit i Kombeve të Bashkuara votoi në unanimitet që t’i rekomandojë Asamblesë së Përgjithshme që të konfirmojë për një tjetër mandat në krye të OKB-së Sekretarin e Përgjithshëm, Antonio Guterres.
Aprovimi nga Asambleja është një formalitet, pasi Guterres është i vetmi kandidat. Ai drejton OKB-në që prej vitit 2017-të.
10 emra qarkulluan si kandidatura të mundshme, por asnjëri prej tyre nuk u zyrtarizua pasi asnjë prej 193 vendeve anëtare të OKB-së nuk i mbështeti.
Lindur në Lisbonë në vitin 1949, Guterres ka mbajtur në të shkuarën postin e Komisarit të OKB-së për Refugjatët dhe nga 1995 deri në 2002 postin si Kryeministër i Portugalisë.