Bardhosh Lytaj Alias Mino, i shpallur në kërkim nga policia greke dhe që u vu në pranga nga policia e Vlorës mbrëmjen e se hënës ka një historik të gjatë grabitjesh dhe vrasjesh.
Ai akuzohej në shtetin fqinj për vjedhje të kryer në bashkëpunim, vjedhje me pasojë vdekjen e më shumë se një personi, grabitje me armë kryer në bashkëpunim dhe vrasjen e dy turistëve anglez në Patra të Greqisë.
Këto akuza rendojnë mbi të për një ngjarje të ndodhur në vitin 1998 në territorin grek. Mino grabiti dhunoi dhe vrau dy turiste anglez në afërsi të Patrës dhe për këtë ngjarje gjykata e shkallës së parë në Patra e dënoi atë me burgim të përjetshëm.
Mbi Minon rendojnë edhe akuza e trafikut të lëndëve narkotike, prodhim dhe shitje e lëndëve narkotike për të cilën gjykata e Kretës e ka dënuar me gjashtë vite burg.
Mino është dënuar nga Gjykata e Korfuzit me pesë muaj burg dhe për vjedhje të energjisë elektrike.
Në dosjen e siguruar nga prokuroria rezulton se Mino ka edhe një arratisje nga burgu i Greqisë në kohen kur vuante dënimin për ngjarjen e dy turistëve anglez.
Vendim i gjykatës së Shkallës së Parë në Patra të Greqisë, pritet te konvertohet ne burgim te përjetshëm ne Shqipëri teksa dënimin do ta vuaje në Shqipëri kjo për faktin sepse midis Greqisë dhe Shqipërisë nuk ka një marrëveshje për ekstradime.
