Ngjarjet e rënda të ndodhura gjatë kohëve të fundit në Lushnjë, dyshohet se janë bërë shkak për shkarkimin e tre zyrtarëve të Policisë së këtij qyteti.
Sipas burimeve, Drejtori i Përgjithshëm i Policisë së Shtetit, Ardi Veliu, nëpërmjet një urdhri të fundit, ka shkarkuar shefin e komisariatit, shefin e krimeve dhe shefin e rendit dhe sigurisë në Policinë e Lushnjës.
Po ashtu, është bërë edhe zëvendësimi i tyre. Shkarkimet e tyre mësohet se janë komunikuar ditën e djeshme në institucion, ndërsa mësohet se në vend të drejtuesit të komisariatit, Elton Pepa, është emëruar Adrian Metani.
Për të forcuar strukturën e këtij komisariati dhe zbardhjen e krimeve, vendin e Kastriot Stafastanit si shef krimesh e zë Klodian Jashari, ndërsa Ervin Myzeqari si shef rendi, zëvendësohet nga Altin Çela.
NDRYSHIMET
Ndryshimet vijnë pas ngjarjeve të shumta mafioze në këtë qytet, duke rikthyer frikën e ngjarjeve të vitit 1997.
Pikërisht ditën kur vendi ishte në ceremoni festive për ndërrimin e viteve, në godinën e Bashkisë së Lushnjës ndodhi një krim i rëndë ndaj kryebashkiakut. Ish-shoferi i tij hodhi në zyrë një bombë luftarake, duke plagosur kreun e bashkisë, Fatos Tushen, dhe sekretaren e tij.
Ndërkohë, në tetor të vitit të shkuar u ekzekutua në lokalin e tij Besmir Hida, 35 vjeç. Hida ishte daja i Zamir Latifit të vrarë në tetor të vitit 2017 bashkë me Jurgen Hoxhën. Po ashtu, më 14 dhjetor u ekzekutua sërish në lokalin e tij Enver Boriçi, vëllai i Arben Boriçit, i dënuar me burgim të përjetshëm si pjesëtar i bandës së Lushnjës.
Enver Boriçi ka qenë gjithashtu pjesë e bandës së Lushnjës. Për të dyja këto vrasje nuk ka asnjë të arrestuar apo të shpallur në kërkim, gjë e cila duket se ka çuar në marrjen e masave për Komisariatin e Lushnjës.
SULMI NDAJ “SHTETIT”
Lëvizjet e bëra në Policinë e Lushnjës, dyshohet se vijnë si shkak për performancë të dobët në detyrë. Më 31 dhjetor 2019, u shënua ngjarja e rëndë, ku u sulmua edhe godina shtetërore, ajo e bashkisë. Shtetasi Gëzim Saraçi, orët e para të mëngjesit të kësaj date, ka hyrë i qetë dhe i pa ndaluar nga askush në ambientet e Bashkisë Lushnjë.
Ai u ka thënë rojave në katin e parë të bashkisë se do të shkonte të takonte pak Fatos Tushen. Gëzim Saraçi ka qenë më herët shoferi i kryebashkiakut. Ndërkohë, sapo ka shkuar në zyrën e Tushes, janë dëgjuar ngritje zërash nga të dyja palët.
Saraçi mbante në dorë një granatë ofensive, të cilën ia ka hedhur në zyrë Tushes dhe më pas u largua në drejtim të paditur. Si pasojë e shpërthimit të granatës, kryebashkiaku Tushe dhe sekretarja e tij u plagosën, por pa rrezik për jetën.
