Prekja e Piperos nga Covid-19, Bino : Duhet të kalojnë 6 javë nga doza e parë që të arrish një mbrojtje

269
Sigal

Prekjen e mjekut të njohur Pëllumb Pipero nga Covid-19, dy javë pasi u vaksinua, është komentuar edhe nga shefja e epidemiologjisë në Institutin e Shëndetit Publik, Silva Bino. Ajo thotë se fakti që bën vaksinën nuk do të thotë se je i mbrojtur menjëherë, duke theksuar se duhet të kalojnë deri në 6 javë nga doza e parë që të arrish në mbrojtje.

”Problemi është se nuk kam qejf të flas shumë për Pëllumbin se është një figurë e njohur. Por duke qenë se është bërë objekt diskutimi. Ai është në gjendje të mirë shëndetësore. Fakti që bën vaksinën nuk do të thotë se patjetër je i mbrojtur menjëherë. Nuk krijohen antitrupat menjëherë. Fakti që Pfizer e ka dozën e dytë pas tre javësh do të thotë se arrijmë një reagim të mirë pas 3 javësh. Ne i mbështetemi të dhënave që ka Pfizer.

Deri tani nuk mund të themi se ke mbrojtjen të plotë. Deri në dy javë pas dozës së dytë mbrojtja shkon në 95 %. Duhet të kalojnë pra 6 javë nga doza e parë që të arrish një mbrojtje. Kjo vlen për të gjitha llojet e vaksinave. Vaksina ndaj koronavirusit ne themi se nuk ndalon transmetimin por sëmundjen. Si vaksina e gripit. Ti mund ta marrësh virusin dhe ta transmetosh atë. Ti për vete mund të kalosh një formë fare të lehtë të sëmundjes. Mund ta transmetosh tek të tjerët por vetën nuk ke formë të rëndë. Jetojmë në një kohë kur nuk ka moral në shpërndarjen e vaksinave.

Është një paturpësi botërore. Ka një pabarazi e parashikuar në letër 10 vite më parë. Sot Pfizer ka bërë një kontratë në lidhje me përdorimin e atyre ndërmarrjeve të tjera për të prodhuar vaksinën. Besoj që BE do t’i ketë dozat e veta dhe ne do t’i kemi dozat tona. Ne i kemi vaksinat që ata që kanë marrë dozën e parë të mund të marrin edhe të dytën.

Menaxhimi ka qenë perfekt. Kjo ka shërbyer si një lloj praktike sepse menaxhimi përmban disa sfida. Ne po kryejmë trajnime. Në rrethe të tjera nuk kemi kryer por me ardhjen e dozave do të vazhdojë edhe në pika të tjera. COVAX ka arritur një marrëveshje me Pfizer. Shqipëria do të marrë dozat e veta sipas marrëveshjes që besoj do të vijnë brenda shkurtit”, u shpreh Bino.