Nga e marta, rikthehet dimri. Temperaturat zbresin deri në -1 gradë

25
Sigal

Kapriçot e motit si rezultat i ndryshimeve klimatike kanë bërë që në Shqipëri të përjetohet brenda një jave vera, pranvera dhe dimri.

Pas temperaturave tipike verore, që ditët e fundit arritën deri në 33 gradë, në vend do të rikthehet dimri.

“Dita e martë do sjellë vranësira të dendura, në pjesën e dytë të ditës ka zhvillim të tyre. Reshjet fillojnë në veri dhe gradualisht do të përfshijnë të gjithë territorin. Kjo do bëjë që gjatë natës së martë dhe e mërkura të jenë me rrebeshe shiu”, – thotë sinoptikania Lajda Porja.

E enjtja do te sjellë një masë më të ftohtë ajri, madje në zonat malore nuk do të mungojnë as reshjet e dëborës.

“Nga e enjtja kemi depërtim të një mase më të ftohtë nga Europa Veriore duke u futur drejt Ballkanit. Shqipëria do të ketë reshje shiu në Ultësirën Perëndimore, rikthehen reshjet e dëborës në zonat verilindore. Kjo do të shoqërohet me rënie të ndjeshme të temperaturave. Mëngjesi i së enjtes dhe i së premtes është edhe -1 gradë.”

Dy javët e fundit të prillit do të mbyllen me mot të paqëndrueshëm dhe të freskët. Problem do të jetë era deri 70 km/orë.

Për sinoptikanët, temperaturat në pjesën e dytë të muajit do të jenë tipike pranverore, ndryshe nga ato që përjetuam në 15-ditëshin e parë të prillit.