Partia Socialiste dhe Lëvizja Socialiste për Integrim kanë gjetur sot konsensusin për të taksuar qytetarët që përdorin automjete me gaz.
Me kërkesë të deputetëve të LSI-së, taksa e re e miratuar sot në Komisionin e Ekonomisë nuk do të jetë 13 lekë për litër, siç kërkonte qeveria, por është ulur në 8 lekë për litër.
Më herët LSI pati kërkuar anulimin e kësaj takse, por pas konsultimeve mes grupeve parlamentare dhe qeverisë u pranua propozimi i deputetit socialist Anastas Angjeli për vendosjen e një takse 8 lekë për litër. Nga ana e saj PD-ja nuk e votoi taksën e re, me pretendimin se ajo rëndon qytetarët.
“Shpreh zhgënjimin që kam me kolegët e grupit të LSI që tolerojnë. Atë që e nisn si qëndrim parimor e përfundojnë në një garë për rritjen e çmimit me kaq apo me aq,. Shpresoj të mos mbajnë të njejtin qendrim edhe me plehrat”, tha deputeti Edmond Spaho.