Bardhyl Musai, do të bëjë “reformat arsimore”
Taksa e habitshme, një ish-këshilltar mjaft i ethshëm i ish-Kryeministrit Berisha, caktohet nga MAS si njeriu që do të “ndjekë nga afër dhe do të realizojë reformën arsimore” në DAR Durrës. Bardhyl Musai, ish-këshilltari i Sali Berishës do të kryesojë reformën në shkollat e Qarkut të Durrësit dhe ky lajmi është bërë i ditur nga burimet e DAR. Ditët e fundit një e-maili u është dërguar të gjitha shkollave, ku bëhet edhe njoftimi. Ish –këshilltari për arsimin (që vetëm për arsimin nuk ishte) i Berishës, është përzgjedhur ndër më të “besuarit” e Ministrisë së Arsimit dhe Sporteve, për të ndjekur një nga prioritetet kryesore të arsimit shqiptar. Ai është emëruar në krye të një ekipi që do të “kualifikojë” të gjithë mësuesit në shkallë vendi, gjë të cilën e ka bërë edhe gjatë 8 viteve të qeverisjes së PD. Në një e-mail të dërguar në të gjitha shkollat është theksuar se “në mesin e muajit nëntor 2014 para Konferencës Ndërkombëtare Arsimore të Shqipërisë me temë “Dimensione europiane në kontekstin kombëtar”, do të zhvillohen edhe katër vvork-shop-e nga ish-këshilltari Musai. Ai sërish, si 8 vite më parë ka shfrytëzuar këtë rast për të “vjelë” xhepat e mësuesve, pasi çdo njëri prej tyre për të përfituar “Certifikatën Musai ” është i detyruar të paguajë 1500 lekë, ose 12 euro. Ish këshilltari për arsimin në qeverinë e “Berishës” ka bashkëpunuar me zyrtarët e Ministrisë Arsimit dhe Sporteve për të arritur dhe për t’u bërë “referues i temave metodike për mësuesit” nga gjithë vendi. Si për ironi të fatit personazhi, i cili është vënë në qendër të kritikave dhe akuzave lidhur me një sere skandalesh që kanë ndodhur në arsimin shqiptar në ish- qeverisjen e Berishës, është zgjedhur të kualifikojë arsimtarët përmes temës “Formulimi i rezultateve të të nxënit me synim kompetencat”. Këtë herë ky ish-këshilltar që e katandisi arsimin shqiptar në falimentim dhe rrënimit ka mundur të ngjitet në majat e MAS. Ky dikaster nuk dihet pse ka pranuar ofertat e ish-këshilltarit, dhe ka miratuar programin e kualifikimit kundrejt pagesës 12 euro nga mësuesit. Për t’i shpëtuar ndonjë zhgënjimi, proteste apo denoncimi nga mësuesit, në e-mail dërguar shkollave shkruhej se, “pjesëmarrja në këto kualifikime për të përfituar certifikatën bëhet me dëshirë”. Por ky e-mail bie ndesh me urdhrin e DAR në rrethe, sipas të cilit “për vitin shkollor 2014-2015, duhet të blejnë detyrimisht gjashtë kredite”. Ky urdhër i MAS detyrimisht hedh poshtë e-mailin se “vvorkshop i zotit Musai është me dëshirë”. Ish -këshilltari i zotit Berisha, vjen në këtë tryezë për të kualifikuar mësuesit me emblemën e UT, dhe Qendrës për Arsim Demokratik (CDE). Mjafton të kujtojmë se 8 vitet e shkuara ai ishte në piramidën e lartë të shtetit për arsimin, kur lulëzuan dhe u shumuan shkollat fantazmë, shtëpitë botuese antiligjore, tekste jashtë standardeve, universitete të sajuara etj. Ish-këshilltari ishte mbrojtësi i tyre , i atyre institucioneve të shkollimit që prodhuan diploma fiktive, shkatërruan të ardhmen e mijëra të rinjve. Pikërisht me firmën dhe veshin e shurdhër të ish- këshilltarit për arsimin, pronarë të shkollave fantazmë dhe universiteteve pirate dhe shtëpive botuese, prodhuan tekste skandaloze dhe mbushën xhepat me lekë me shitjen e tyre. Dalja në skenë e ish-këshilltarit si i besuar i MAS ka hedhur dyshime dhe ka ngjallur reagime të shumta. Ditët e fundit DAR Durrës, ka urdhëruar drejtorët e shkollave të ushtrojnë presion tek mësuesit për të marrë “Certifikatën Musai” kundrejt 12 euro pagesë. Deri tani një kredit ka qenë 1000 lekë, ndërsa Musai si një nga përgjegjësit kryesorë të kthimit prapa të arsimit shqiptar, kërkon 1500 lekë apo 12 euro për një kredit. “Certifikata Musai” bie ndesh vendimet e MAS, sipas të cilit “do të ndalohen procedurat e deritanishme të kualifikimit me pagesë të mësuesve”. MAS ka deklaruar se, “në vitin shkollor 2014-2015 të gjitha kualifikimet e mësuesve do të bëhen falas dhe nuk do të ketë më kredite me lekë”. Por në realitet ishte dhe është ndryshe. Ka qenë ish- ministri Myqrem Tafaj që detyroi mësuesit të paguanin për të marrë pjesë në kualifikime. Për herë të parë kreditet me detyrim u vendosën në vitin shkollor 2012-2013 dhe çdo kredit paguhej 1000 lekë. Kualifikimi në këtë rast zhvillohej në Durrës dhe mësuesit u dyndën me dhe pa dëshirë të paguanin lekët si mundësi e vetme për t’u mbrojtur . Disa mësues që njiheshin si sekserë të DAR dhe shtëpive botuese mbushnin xhepat. Pazare të tilla po bëhen të kushtueshme për mësuesit të cilët këtë herë do të duhet të shkojnë në Tiranë për të marrë një “Certifikatën Musai” nga njeriu që i solli arsimit vetëm shkatërrime, kurse për vete vetëm përfitime.
Tefik OSMANI
