Mure të shembura, inerte, rrënoja dhe drurë që digjen për t’u ngrohur.
Kjo është situata në lagjen “5 Maji” në Tiranë, ku para dy ditësh, pas një aksioni të IKMT u prishën afro 30 shtëpi.
78-vjeçarja Liza Marku, tha se nuk e kanë lejuar që të marrë sendet personale dhe ilaçet që përdor për sëmundjen.
Ajo, theksoi se nuk do të largohet nga banesa e rrënuar, pasi nuk ka para të përballojë qiratë e larta në Tiranë. Marku kërkon nga shteti që t’i rikthehet shtëpia që kishte.
“Jam 78-vjeçe, quhem Liza Marku. Kam jetuar jashtë. E kishin lënë në orën 10 për ti prishur, kanë ardhur në 7 e 30. Ata kanë hyrë në kabinë, kanë fikur dritat.
Me ne u sollën sikur jemi diversantë. kërkova rrobat personale për t’i marrë, nuk më lejuan. Turpi më i madh është të merren me një plakë, duke më kap për leckash 4-5 policë.
As Serbi në Kosovë s’ka bërë si kanë bërë ata atë ditë. Unë i thash që hajde bëjmë kontratë, po jo ta prishin e të thonë ik ku të duash. Kam shkuar në Bashki për të folur, s’jam pranuar. Nuk kemi ku të shkojmë. Nuk më kanë lënë të marr ilaçet e mia.
Qiraja është 300-400 mijë, ku të gjej lekë, sepse unë 100 mijë marr qira. Unë këtu do të jetoj, edhe nëse temperaturat janë të ulëta. S’kemi ’u të shkojmë.
Po luftojmë me jetën. Unë dua të kem shtëpinë time, ashtu siç e kam pasur, metër për metër, centimetër për centimetër. Nuk kam ku të shkoj. Më vjen zor të shkoj diku”, tha e moshuara.
