Një 43-vjeçar është vënë në pranga nga policia e Skraparit, pasi dyshohet se ka marrë pllaka në Malin e Tomorrit, në një zonë të shpallur ‘Park Kombëtar”.
Sipas njoftimit të policisë, 43-vjeçari me inicialet D.B., është kapur nga shërbimet e pyjores, teksa po transportonte materialin e gurit me kamion.
43-vjeçari, banues në Poliçan, është ndaluar dhe i është bërë kontrolli, duke nxjerrë zbuluar kështu edhe veprimtarinë e paligjshme. Ai akuzohet se ka dëmtuar habitatin natyror të zonës së mbrojtur.
Njoftimi i policisë Skrapar:
Vijon kontrolli për parandalimin, evidentimin dhe goditjen e veprimtarisë së kundërligjshme që shkakton dëmtime në zonën e mbrojtur të malit të Tomorit.
Ushtronte aktivitetin e nxjerrjes së pllakave dekorative në mënyrë të kundërligjshme, arrestohet 1 shtetas, për veprat penale “Dëmtimi i habitateve në zonat e mbrojtura mjedisore” dhe “Kundërshtim i punonjësve që kryen një detyrë shtetërore ose shërbim publik”.
Në vijim të goditjeve të njëpasnjëshme ndaj veprimtarisë së kundërligjshme të nxjerrjes së pllakave të gurit në malin e Tomorit, nga specialistët e Seksionit për Krimet u bë arrestimi në flagrancë i shtetasit:
•D. B., 43 vjeç, banues në Poliçan.
Arrestimi i tij u bë pasi dyshohet se në mënyrë të kundërligjshme ka nxjerrë pllaka guri dekorative, në Malin e Tomorit, zonë e shpallur “Park Kombëtar”, duke dëmtuar habitatin natyror të zonës së mbrojtur.
Ky shtetas, materialin e gurit të nxjerrë në mënyrë të paligjshme po e transportonte me mjetin tip kamion kur u konstatua nga shërbimet e pyjores.
Shtetasi D. B nuk iu është bindur shërbimeve të zonave të mbrojtura, për kryerjen e veprimeve te tyre.
Materialet u referuan në Prokurorinë pranë Gjykatës së Shkallës së Parë Berat, për veprime të mëtejshme.
