Është arrestuar i dyshuari kryesor i vrasjes së 18-vjecares, Marigona Osmani në Ferizaj të Kosovës, Dardan Krivaqa. Lajmin e ka konfirmuar një zyrtar i policisë së Kosovës.
“Para dy tre minuta e kemi marrë konfirmimin se Dardan Krivaqa është arrestuar në Ferizaj.
Njësitet policore janë në terren, janë duke e sjellë në polici, është arrestuar në territorin e Ferizajt me një fshat, pas pak dalim me komunikatë për shtyp”, thotë ai.
Dardan Krivaqa është i dyshuari kryesor për vrasjen e 18-vjeçares Osmani e cila u dërgua të dielën mbrëma pa shenja jete në urgjencën e Ferizajt.
I arrestuar si i dyshuar për këtë rast është edhe Arbër Sejdiu që u vu në pranga dy ditë më parë.
Krivaqa, emër i njohur për policinë ishte në kërkim prej dy ditësh.
Marigona do të përcillet për në banesën e fundit ditën e sotme ndërsa babai i saj është shprehur më herët për mediat se vajza e tij jetonte prej dy muajsh me Dardanin.
Sipas tij, vajza ishte nën presion dhe e frikësuar por nuk kishte guxuar që t’i tregonte se çfarë e mundonte.
