Akademik, profesor në Ekonomi-Financë, me një kontribut të shquar në këtë fushë, veçanërisht në financat publike dhe në reformat strukturore në ekonomi. Prej vitit 1982 e në vijim, ka kontribuar në profesoratin e Fakultetit të Ekonomisë të Universitetit të Tiranës dhe, pas vitit 1990, me angazhimin e tij në politikë.
Ka qenë deputet i Kuvendit të Shqipërisë në vitet 1991–2005, disa herë drejtues i komisioneve kuvendore për çështjet ekonomike e financiare, si dhe ministër i Ekonomisë, ministër i Financave dhe ministër i Punës dhe Çështjeve Sociale për një periudhë të gjatë gjatë tranzicionit.
Akad. Anastas Angjeli është anëtar i Akademisë së Shkencave të Republikës së Shqipërisë që prej vitit 2009. Prej qershorit 2013 është rizgjedhur deputet i Kuvendit të Shqipërisë. Është afirmuar si një nga ekonomistët-financierë më të shquar, veçanërisht në zbatimin e reformave të ekonomisë së tregut në Shqipëri.
Kontributi i tij i veçantë në reformën buxhetore dhe fiskale, në zhvillimin e sistemit financiar (bankar dhe jobankar), në zbatimin e politikave fiskale në dobi të zhvillimit të biznesit dhe të investimeve vendëse dhe të huaja në Shqipëri, në zhvillimin e lirisë ekonomike, në kryerjen e reformave strukturore dhe privatizimin e ekonomisë, si dhe në liberalizimin dhe integrimin e ekonomisë shqiptare në atë rajonale dhe evropiane gjatë periudhës së tranzicionit, është vlerësuar jo vetëm nga opinioni publik vendas, por edhe nga institucionet ekonomiko-financiare ndërkombëtare.
Akad. Anastas Angjeli, prej muajit korrik 2014, është zgjedhur anëtar i Akademisë Evropiane të Shkencave dhe Arteve.
