Me dhimbje të thellë njoftojmë ikjen prej nesh të shokut, mikut, kolegut tonë të dashur regjisorit të shquar KUJTIM GJONAJ.
Ky eshte nje lajm trondies per boten e filmit. Kinematografia shqiptare humbi nje nga personalitetet me te shquara te saj .
Skenarist, regjisor i filmave dokumentarë, publiçist, botues dhe producent, lindi në Tiranë më 13 Nëntor 1946. Kreu studimet në Universitetin e Tiranës për gjuhë-letërsi. Fillimisht punoi si redaktor dhe në shkrimin e teksteve të kinoditarëve dhe nga viti 1974 kaloi si regjisor në filmat dokumentarë dhe kronikalë. Realizoi rreth 35 filma ndër të cilët: “Tregim për një hero” 1976, “Shqipëria në panairet ndërkombëtare” 1981, “Kryengritjet e mëdha” skenari dhe regjia,1982, nderuar me çmim të dytë në konkursin kombëtar letrar artistik për skenarin, “Tetori i këngëve”, “Arti mesjetar shqiptar” dhe “Po lufton Idriz Seferi” 1984, “Kur nis një këngë rinie” dhe “Studiues i pasionuar” 1985; “Bashkëkohësit”, “Kështjella e këngëve” i cili u nderua me Çmimin e Parë dhe Kupën e Festivalit të 8-të të Filmit Dokumentar Shqiptar; “Më e madhja dashuri” 1986, i cili u vlerësua si filmi dokumentar më i mirë i vitit; dhe “Shembja e idhujve” bashkautor në skenar dhe regji, 1995 – nderuar me çmim të veçantë në Festivalin Ndërkombëtar të filmave të shkurtër, në Palermo, 1998; etj. Si skenarist është autor i mbi 30 skenarëve të filmave dokumentarë, bashkautor i tre skenarëve të filmave artistikë “Thirrja” 1976,” Cirku në fshat” dhe “Ata ishin katër” 1977, si dhe autor i skenarit të filmit artistik “Këshilltarët” 1979. dhe në filmin “Gjaku ynë i shprishur” 1999.
Filma të tjerë dokumentarë: “Vullnetarë në metalurgji” 1975; “Në gjirin e klasës” 1976/;” Porcelani ynë” 1980, “Rinia dhe çeliku” 1980; “Tokat e thata”, “Edhe thërrimet janë bukë” 1981; “Lidhja shqiptare e Prizrenit” 1981, “Ditët e Komanit” 1981, “Artistë në punë dhe në jetë”, “Zëri yt, rini” dhe “Blerim në bregdet” 1982; “Në gjurmët e një historie” 1983 ; “Djemtë e Valiasit” dhe “Qytet në telajo” 1984; “Delegacioni francez në Shqipëri,” /; “Pranvera e një qyteti” 1986 ; “100 vjetori i mësonjëtores së parë shqipe” dhe “Punëtorët e brezareve” 1987; “Porosi të çmuara”1987, “Etyd pranë detit” 1987, “Drejt Evropës”, 1991; “Shqiptarët e Zvicrës”, 1992; “Jeronim De Rada”, 1998; “Luani i Janinës /Ali Pashë Tepelena”, 2000.
Nga viti 1984-1990, ka dhënë mësim në kurset pasuniversitare të kinematografisë dhe nga 1992-1994 botoi revistën e përmuajshme kulturore “Bota shqiptare”.
Filmat e fundit si “Konica”, “Nënë Tereza”, “Ëndërra e Çamërisë”, “Magjia Pano”, “Margareta Xhepa”, “Rilindasi I fundit” etj
Është marrë edhe me publicistikë duke shkruar shumë artikuj për filmin dhe kinematografinë shqiptare në organet qendrore të shtypit. Për veprimtarinë e tij letrare në tregime dhe reportazhe është nderuar me tre çmime më 1967,1968,1981.
Nga viti 1994, përveç veprimtarisë regjisoriale, është edhe botues dhe producent i firmës “Bota shqiptare produksion”. Ka botuar rreth 30 libra të autorëve shqiptarë dhe të huaj si dhe producent i 5 filmave. Është nderuar me disa çmime nga Rrethi i Tepelenës, “Nderi i Qarkut” të Gjirokastrës, nga shoqata patriotike “Labëria “Nder i Kombit etj. Për arritjet e tij cilësore në fushën e kinematografisë, nga Presidenti i Republikës, i është dhënë titulli “Mjeshtër i madh”.
Lamtumire kolegu dhe shoku yne i zemres.
