Ali Bregu (mësues dhe drejtor shkolle 1962-1971)
Porsi gurgullimë lumi,
Malli im vërshon nga larg,
Si ndër kanione Osumi,
Për t’u çlodhur në çdo prag.
Ti zë fill ku rrjedh “Guhak”-u.
Lartohesh ku shfaqet dielli.
Këmbët lan me ujë Osumi,
Sytë me kaltërsi qielli.
Çlodhem pranë Riza Cerovës.
Kujtoj bijtë e tu të ndjerë,
Mullixhiun e Sharovës*,
Demir Zykon e të tjerë.
Mestan trimin, luftëtarin,
Gjith’ martirët e lirisë,
Xhelal trimin, firmëtarin,
Krenari e Shqipërisë.
Xha Rizanë, trim me famë,
Estref Cakën e Osojës,
Tekiun e Kahremanë,
E të gishtit, e të gojës.
Kujtoj Ferit kapedanë,
Sypatrembur e të besës,
Tefik e Tajar, luanë,
Krenaria e Vendreshës.
Gjithë ata njerëz punëtorë,
Të zgjuar, etur për dije,
Që na mëkuan çdo orë,
Veç me fjalë mirësie.
Me gjith’ shpirt e me gjithë zemër
Flas me zë e flas me letër,
Me të gjithë emër për emër
Dhe Xhevon* si askush tjetër.
Uji rrjedh nga Qaf’ e Martës
Gjithë potere- gurgullime,
Është mesazh i Lace Backës,
Kënga jote për lavdinë.
Këng’ e re, raki e vjetër,
Ku rrojnë njerëz bujarë,
Ku Iljazi* ka shtëpinë,
Malli për ju ç’më ka marrë !
Për ju ku kokën mbështeta,
Porsi në prehër të nënës
Dhe në zemrat tuaja mbeta,
E mësues, edhe nxënës.
Bëj të rri, më nuk rri dot,
Bëj të ik, ti më mban pranë.
Të uroj për jetë e mot:
“Veç për mirë ta ndjefsha zënë!”
Shënim :
1-Mullixhiu i Sharovës, është pseudonimi i Heroit të Popullit, Zylyftar Veleshnja .
2-Iljazi -Shkrimtar humorist nga Skrapari
3-Xhevon- Xhevair Spahiu, poet i madh dhe “Nder i Kombit” .