Kryetari i Kuvendit të Shqipërisë, z. Ilir Meta zhvilloi një bisedë telefonike me Kryetarin e zgjedhur të Parlamentit të Maqedonisë, z. Talat Xhaferri.
Pasi e uroi z. Xhaferri për zgjedhjen e tij në krye të Parlamentit të Maqedonisë, z. Meta i shprehu keqardhje për dhunën e papranueshme në ambientet e Parlamentit të Maqedonisë, duke e siguruar për mbështetjen e plotë të Kuvendit të Shqipërisë ndaj stabilitetit dhe demokracisë në Maqedoni.
Z. Meta gjithashtu theksoi rëndësinë për zgjedhjen e krizës në Maqedoni përmes mjeteve kushtetuese dhe demokratike duke dhënë mbështetjen e plotë të Kuvendit të Shqipërisë duke e vlerësuar krizën në Maqedoni si një krizë politike dhe jo ndëretnike.
“Shpreh keqardhje për dhunën e papranueshme në ambientet e Parlamentit të Maqedonisë. Ne ju japim mbështetjen e plotë të Kuvendit të Shqipërisë për stabilitetin dhe demokracinë në Maqedoni. Kriza politike duhet zgjidhur përmes mjeteve kushtetuese demokratike. Ky konflikt në Maqedoni është politik dhe jo ndër-etnik”, – u shpreh z. Meta.
