“Ku i mban babi lekët”, hajdutët në Fier dhunojnë djalin e mitur, përfundon në spital

162
Një ditë më parë një djalë i mitur në fshatin Cakran të Fierit ka parë tmerr me sy kur persona ende të paidentifikuar i kanë hyrë në banesë me qëllim për të grabitur.
Policia e Fierit bën me dije se ngjarja ka ndodhur në banesën e shtetasit L.H, 42 vjeç, i cili nuk ndodhej në banesë në momentin kur grabitësit kanë hyrë për të vjedhur. Të bindur që do të gjenin para, grabitësit kanë dhunuar djalin 8 vjeçar të L.H duke i kërkuar me ngulm se ku ishin fshehur paratë.
Nuk dihet nëse i mituri ka treguar diçka, as nëse grabitësit kanë mundur të marrin të holla nga banesa. Policia e Fierit thotë se atë e kanë dërguar në spital për mjekim, ndërsa po punohet për identifikimin e autorëve.
NJOFTIMI I POLICISË
Më datë 22.01.2018, u referuan materialet në Prokurorinë e Rrethit Gjyqësor Fier dhe po punohet për identifikimin dhe kapjen e autorëve pasi në fshatin Cakran, Fier, pasi persona të paidentifikuar janë futur në banesën e shtetasit L.H, 42 vjeç dhe kanë lënduar fëmijën e tij 8 vjeçar, duke i kërkuar vendndodhjen e lekëve të prindërve, të cilët nuk ndodheshin në banese. Fëmija mori mjekim ne spital dhe tani ndodhet në banesë (Nenet 139 e 22 të Kodit Penal).