Nëse për dashurinë time kam kënduar
Është era që më dëgjon.
Trupit më mbështillet e më rrëqeth,
Pastaj më kap duart e me mua vallëzon.
Nëse për dashurinë time kam shkruar
Me guaska ëndrrash diku në një breg,
Veç deti lexon ditarin e shpirtit
Veç ai me valët zemrën time prek.
Nëse për dashurinë time kam folur,
Ia kam thënë pulëbardhës në fluturim.
Dhe një manushaqeje që ëmbël puthej
Nga pikat e vesës së ditës në zgjim.
Nëse për dashurinë time kam jetuar
Në sytë e tu rob e kapur,
Në puthjen tënde mbetur peng
Burgosur në krahët e tua i dashur.
Nëse për dashurinë time kam vuajtur
Kur mes turmës humbte hija jote,
Më duhej imazhin tënd të kërkoja
Në rrugët pa fund të kësaj bote.
Nëse për dashurinë time kam shpresuar
Dhe hënës i jam lutur në lot,
Është se me mungesën tënde
Ende s’jam mësuar dot……
2
Flet Loti!
Erdhi tek unë jo pak e tronditur
E dinte se merresha me fidanët,
Nën qerpikë loti i shumëpritur
Më nguti t’i ndizja shandanët.
Për të hedhur një skicë a një varg
Shandanët i ndeza vërtet…
Rremi i vështrimit për larg
Shtegtonte në tagrin e vet.
Flet Loti. Lashë pezull më duket
Pa thënë. Kur më kërkoi Bedria…
Vdekjen, nepsi ta hip më lutet
Në Toptanin e halleve të mia.
Vdekja e Qershisë e nxiti
Lotin të zbriste përtokë,
Në rrokopujë e dilemave të mia
Shqetësimi matej me okë .
Flet Loti. Përtypa pa shije
Për Atkinën që mbeti pa shalë,
Sall për një fidan qershie
Me Matra Hulin ndërrova fjalë.
E lamë për sezonin e vjeshtës
Vdekjen e qershisë ta vëmë në gjumë,
Tek ngjitej në tehun e heshtës
Loti llamburiste aq shumë…