LONDER – Shërbimi Kombëtar i menaxhimit të të Dënuarve (NOMS) i këshillon Shqipërisë të hapë burgje private (për dënimet deri në 5 vjet) si dhe implementimin e burgjeve me regjim të hapur ose burgjeve ditore.
Sipas drejtuesve të NOMS, këto mënyra të vuajtjes së dënimit duhen parë si një fazë e ndërmjetme nga izolimi i personave të dënuar, drejt lirisë, duke i ndihmuar të përshtaten në komunitet e njëkohësisht duke lehtësuar rehabilitimin e tyre.
Këto sugjerime ju përcollën ministrit të Drejtësisë Nasip Naço, i cili ndodhet në Angli ku po zhvillon takime lidhur me organizimin dhe funksionimin e burgjeve private si dhe elementëve të sigurisë në sistemin penitenciar dhe në shërbimin e provës.
Naco takim me Selous: Bashkëpunim mes vendeve për përmirësimin e burgjeve
Organizimi dhe funksionimi i burgjeve private, elementët e sigurisë në sistemin penitenciar dhe në shërbimin e provës janë disa nga çështjet ku është fokusuar kjo vizitë, pjesë e së cilës ishte edhe takimi me Z. Andreë Selous, Ministrin për Burgjet, Shërbimin e Provës dhe Rehabilitimin, si edhe zyrtarë të tjerë të lartë të shërbimit penitenciar në Angli dhe Wells.
Gjatë takimit me Ministrin e Burgjeve, Shërbimit të Provës dhe Rehabilitimit në Mbretërinë e Bashkuar, z. Andreë Selous, biseda u fokusua mbi bashkëpunimin e shkëlqyer mes dy vendeve e në veçanti mbi reformat e ndërmarra në drejtim të përmirësimit të sistemit penitenciar në vendin tonë, përmes përvojës dhe modelit të sistemit penitenciar të Mbretërisë së Bashkuar, si dhe asistencës për trajnime përsa i përket përmirësimit të Shërbimit të Provës.
Vijimësia e asistencës përmes këshilltarëve dhe ekspertëve më të mirë të fushës, madje edhe përmes atashimit të tyre pranë institucioneve shqiptare të ekzekutimit të vendimeve penale është vlerësuar me mjaft rëndësi gjatë takimit dhe pritet të jetë një ndër bashkëpunimet që do të vijojë edhe në të ardhmen.
NOMS: Shqipëria të drejtohet drejt burgjeve private ose me regjim
Ndërkohë, takimit me Ministrin e Burgjeve, Shërbimit të Provës dhe Rehabilitimit, i parapriu një vizitë në NOMS (Shërbimin Kombëtar të Menaxhimit të të Dënuarve), ku drejtuesit kryesorë prezantuan mënyrën e funksionimit e sistemit penitenciar. Ndër të tjera gjatë këtij takimi u nënvizua idea se Shqipëria përpos sistemit penitenciar aktual duhet të fokusohet drejt mundësisë së hapjes së burgjeve private (për dënimet deri në 5 vjet) si dhe implementimin e burgjeve me regjim të hapur ose burgjeve ditore.
Përfshirja në jetën sociale, propozim për dënime alternative
Referuar rëndësisë së rehabilitimit të të dënuarve në jetën sociale dhe frenimin drejt recidivizmit, gjatë diskutimeve është sjellë në vëmendje edhe rëndësia e aplikimit të një politike penale që fokusohet drejt dhënies së dënimeve alternative, në rastet kur është e mundur, duke i dhënë një tjetër dimension Shërbimit të Provës.
Gjithashtu gjatë takimeve u theksua se një institucion i ekzekutimit të vendimeve penale mund të jetë efektiv nëse siguria dhe rendi janë në nivelin më të lartë dhe njëkohësisht në balancë me nevojën për një vëmendje drejt rehabilitimit përmes mekanizmave efektivë, duke ndihmuar të dënuarit të ndryshojnë. Në përfundim, të dyja palët shprehën besimin e plotë për thellimin e mëtejshëm të bashkëpunimit mes dy vendeve.
